Thanksgiving သင့်စ်ဂစ်ဗင်း ဆိုတာ
သင့်စ်ဂစ်ဗင်းဆိုတာ ပြီးခဲ့တဲ့နှစ်က စိုက်ပျိုးထုတ်လုပ်နိုင်ခဲ့တာအတွက် ကျေးဇူးတင်တဲ့သဘော ဖြစ်တယ်။ ခရစ်ယန် ပရိုတက်စတင့် ပြုပြင်ရေးကတည်းက စတယ်။ ၁၆၂၁ ခုနှစ်က မက်ဆာချူးဆက်၊ ပလိုင်းမောက်သ်က စတယ်။ ဖက်ဒရယ်ရုံးပိတ်ရက်အဖြစ်က ၂၆-၁၂-၁၉၄၁ နေ့မှာ သမတ ရုဇဗဲ့လ် လက်မှတ်ထိုးတယ်။ သင့်စ်ဂစ်ဗင်းနေ့ဟာ ယူအက်စ်အေမှာ နိုဝင်္ဘာလ စတုတ္တမြောက် ကြာသပတေးနေ့ဖြစ်တယ်။ ကြက်ဆင်သား စားသောက်ကြတယ်။ မိသားစုပြန်ဆုံကြတယ်။ မိတ်ဆွေအပေါင်းအသင်းတွေ စုဝေးစား သောက်ကြတယ်။ အဲတာက ဝီကီမှာရေးထားတာ။
ကျောင်းသင်ခန်းစာထဲမှာတော့ အင်္ဂလန် ဘုရားကျောင်းတွေနဲ့ မတူတဲ့ ကိုယ်ပိုင်ဘုရားကျောင်းထူထောင်လိုသူတွေက မေဖလားဝါးသင်္ဘောကြီးနဲ့လာကြတယ်။ သူတို့ကို ပီးလ်ဂရင်မ်လို့ ခေါ်တယ်။ ဘာသာပြန်ရရင် ဘုရားဖူးလာသူတွေ။ ရောက်ရောက်ချင်း ဆင်းရဲတယ်။ စားစရာ ဝတ်စရာကမစုံ။ ရာသီဥတုက အတော်ကိုအေးတယ်။ သူတွေကို ဌာနေလူတွေက ကူညီခဲ့ကြရတယ်။ စားစရာ ဝတ်စရာတွေပေးတယ်။ ပြောင်းဖူးစိုက်နည်းသင်ပေးတယ်။ ဖေါလ် ခေါ် ရွက်ကြွေရာသီရောက်တော့ အင်္ဂလိပ်တွေ အနေချောင်လာကြပြီ။ ဌာနေလူတွေကို ကျေးဇူးတင်လို့ ဖိတ်ပြီး ဧည့်ခံကျွေးမွေးတာကနေ သင့်စ်ဂစ်ဗင်းရယ်လို့ဖြစ်လာတာ။ ဌာနေလူတွေက သမင်သားတွေယူလာကြတာ။ သုံးရက်တိုင်တိုင် အတူတူစားသောက်ကြတယ်။
ကြက်ဆင်စားတာ နောက်မှပါ။ ဖယုံသီးနဲ့လုပ်တဲ့ ပမ့်ကင်ပိုင်ဆိုတာလည်း နောက်မှပါ။ ဘာသာရေးရယ်က ဒီလောက် မဟုတ်ပါ။ မက်ဆီကိုကလာတဲ့ခရစ်ယန်တွေနဲ့ မြန်မာပြည်ကလာတဲ့ခရစ်ယန်တွေက သူတို့ဆီမှာ မကျင်းပကြပါတဲ့။ သိတောင်မသိကြပါတဲ့။ အမေရိန်ကန်တွေကလည်း စီးပွါးရေး လုပ်ကြတာပါ။ ခရစ္စမတ်၊ ဟဲလိုဝင်း၊ သင့်စ်ဂစ်ဗင်း၊ ဗယ်လင်တိုင်းဒေး အားလုံးဟာ ဒေါ်လာဘီလီယန် ဘစ်ဇိနက်။
ကျွန်တော်လုပ်နေတဲ့ကျောင်းမှာက ဘယ်တရားစကားမှ မပြောကြပါ။ ယဉ်ကျေးမှုတရပ်ကိုသာ သိစေအောင်လုပ်တယ်။ ကျောင်းသားတွေထဲမှာ ကိုးကွယ်ရာ ဘာသာအစုံကပါတယ်။ ကနေ့ မြန်မာပြည်ကလာတက်တဲ့ ကျောင်းသူကျောင်းသား ၅ ယောက်သာလာနိုင်တယ်။ ကျွန်တော်ပါဝိုင်းထိုင်တော့ မြန်မာစားပွဲဖြစ်သွားတယ်။
ကျွန်တော်တို့မိသားစုကတော့ ၂ဝ၁၅ ခုနှစ်က ကျေးဇူးတော်နေ့မှာ ဗမာ့မယ်ဇလီဖူးသုပ်စားကြရတယ်။
ဒေါက်တာတင့်ဆွေ
၂၁-၁၁-၂ဝ၁၇
၂၁-၁၁-၂ဝ၁၈
Comments
Post a Comment