တက္ကသိုလ်
စာပေနဲ့ဆိုင်တာကို ပိုသိတယ်။ ဝိဇ္ဇာနှင့်သိပ္ပံတက္ကသိုလ်တွေအထိ အဆင့်ကောင်းပါသေးတယ်။ ဟောပြောပွဲတွေရှိရင် ဝ/သမန်းကို သွားသွားနားထောင်ခဲ့တယ်။ အဲဒီကဆရာကြီးတွေကလည်း ဆေးကျောင်းလာပြီး ဟောပြောကြတယ်။ သီတင်းကျွတ်ပြီးကတည်း မန္တလေးမှာ အငြိမ့်တွေ တီးဝိုင်းတွေသာမက စာပေဟောပြောပွဲတွေလည်း ပေါတယ်။ ပါချုပ် ဦးကျော်ရင်၊ မြန်မာစာပါမောက္ခ ဦးချမ်းမြ၊ ဆန်းထွန်း (မန်းတက္ကသိုလ်)၊ ရူပဗေဒပါမောက္ခဦးကျော်မြင့်၊ စတဲ့ ဆရာကြီးတွေ အဟောအပြောမှာ အချက်အလက်ပါတယ်။ ကျွန်တော်က နားထောင်ကောင်းတိုင်း မကြိုက်တတ်ပါ။ လူထုဦးလှက အေးအေးလေးနဲ့ အပြောကောင်းပြီး မှတ်သားစရာတွေ ပါတယ်။
အဲဒီခေတ်မှာပဲ စာပေဝေဘန်ရေးနဲ့ ဘာသာပြန်ကဗျာတွေ အသံကျယ်လာတယ်။ သိပ်လိုက်မမီပါ။ အဲဒီကာလမှာ ပေါ်ထွန်းလာတဲ့ အညာအခြေစိုက်ကဗျာဆရာတွေဆိုရင် အခုထိနာမည်ကျန်တယ်။ ဒေါက်တာသန်းထွန်းကလည်း အဲဒီကပဲ။
ရန်ကုန်တက္ကသိုလ်နဲ့ အောက်ပြည်က စာပေပညာရှင်တွေကတော့ ပိုများပြီး ပိုပြီးလူသိများပါတယ်။ မြို့တော်ဖြစ်တော့ စာအုပ်ထုတ်ဝေရေးမှာ ပိုသာတယ်။ အညာမှာ လူထုတိုက်တခုသာရှိခဲ့တာ။ ဟံသာဝတီက နောက်မှ။ ခဏသာ။
တို့ဘုန်းကြီးကသာတယ်လို့ အပြောမျိုး မဟုတ်ပါ။ တက္ကသိုလ်ကြီးတွေကို ဗဟိုပြုပြီး အောက်အရပ်နဲ့ အညာမြေမှာ မြန်မာစာပေ ထွန်းကားစည်ပင်ခဲ့တာကို ပြောလိုတာပါ။ တက္ကသိုလ်ကြီးတွေ အဆင့်နှိမ်ခံရကတည်းက စာပေလည်း လူးလွန့်တက်ရတာ ခက်ခဲ့တယ်။ မြန်မာစာ တပိန်ပိန်တလိမ်လိမ်နဲ့ အသက်ဆက်နေပါတယ်။
တက္ကသိုလ်ခေါင်းစဉ်နဲ့ ပညာအကြောင်းဖြစ်ပေမဲ့ ဆယ်တန်းတောင်မအောင်ပဲ စာတွေ အများကြီးဖတ် မြန်မာစာ အင်္ဂလိပ်စာ နှံ့စပ်တဲ့လူရွယ်တွေလည်း မျက်စိအောက်မှာ တွေ့ပါတယ်။ နောက်တက်လူငယ်တွေ အားပေးပါတယ်။ ကောင်းတဲ့ပညာ မှန်တဲ့စာတွေ လက်လှမ်းမီကြပါစေသတည်း။ ဘေးနားက နောက်ပေါက်အပင်သာ မကြည့်နဲ့။ ငှက်တသောင်းနားခိုခဲ့တဲ့ အပင်ကြီးတွေပါ ကြည့်ပါလေ။
ဒေါက်တာတင့်ဆွေ
၂၄-၁၁-၂၀၁၈
Comments
Post a Comment