တကြိမ် နှစ်ကြိမ် သုံးကြိမ်မြောက်အောင်

နှစ်ယောက်ကနေ လင့်ပို့ပေးကြတယ်။ ထီလက်မှတ်အသစ်မှာ (၁) ကြိမ်မြောက်လို့ရေးထားတာ မသင့်ကြောင်း၊ (၂) ကြိမ်၊ (၃) ကြိမ် သုံးလို့ရကြောင်း၊ ပထမအကြိမ်၊ ဒုတိယအကြိမ်လို့ရေးတာမှာ မြောက်မထည့်ရကြောင်း၊ ပါဠိရေးသားနည်း ကိုးကားပြီး ရေးထားတာကို ပို့လာကြတယ်။ ရေးသားတဲ့ သူငယ်တော်တောရဆရာတော်က တစ်ခါတစ်လေဂိုဏ်းက ဖြစ်တယ်။ မှတ်သားစရာတွေပါတယ်။ ကျေးဇူးပါဘုရား။

တခါတလေကို သင်္ဂြိုဟ်ပြီးနောက် တစ်ခါတစ်လေဂိုဏ်း၊ တစ်ခါတလေဂိုဏ်းနဲ့ တခါတစ်လေဂိုဏ်းဆိုပြီး ဂိုဏ်းကြီး ၃ ဂိုဏ်း ပေါ်လာပါတယ်။

မြန်မာ့စွယ်စုံကျမ်းမှာရေးထားတဲ့ ဘုရားရှိခိုးစာမှာ သည်လိုရေးထားပါတယ်။

သြကာသ၊ သြကာသ၊ သြကာသ၊ ကာယကံ၊ ဝစီကံ၊ မနောကံတည်းဟူသော ကံသုံးပါးတို့ဖြင့် ပြစ်မှားမိသည်ရှိသော် ပျောက်ပစေခြင်း အကျိုးငှာ၊ တကြိမ်၊ နှစ်ကြိမ်၊ သုံးကြိမ်မြောက်အောင်၊ ဘုရားရတနာ၊ တရားရတနာ၊ သံဃာရတနာ၊ တည်းဟူသော ရတနာမြတ်သုံးပါးတို့အား ရိုသေမြတ်နိုး၊ လက်အုပ်မိုး၍ ရှိခိုးပူဇော် ဖူးမြော်မာန်လျော့ ကန်တော့ပါ၏ အရှင်ဘုရား။

တ နဲ့ တစ် မတူပါ။ တစ် နဲ့ ပဌမ မတူတဲ့နေရာတွေမှာ မတူပါ။ တခု၊ တကောင်၊ တယောက်လို့ ရေးပါတယ်။ တကျပ် နှစ်ကျပ်လို့ ရေးတယ်။ တစ်-နှစ်-သုံး-လေးလို့ ရေးပါတယ်။

ပဌမဆုရသည် သို့မဟုတ် အဆင့်တစ်ရသည်လို့ ရေးပါတယ်။

ကျွန်တော် ပါဠိမတတ်ပါ။ ပါဠိ-မြန်မာအဘိဓာန်ကိုလှန်တော့ ပဌမလို့သာပါတယ်။ မြန်မာလို ဦးစွာသော၊ အစအမွန်ဖြစ်သော။ ပါဠိ-မြန်မာအဘိဓာန်မှာ ပထမ မပါပါ။

ကဝိဓဇသတ်ပုံကျမ်းမှာ ပဌမ = ပထမ = တခုမြောက်လို့ ရေးတယ်။

ဦးသာမြတ်ရေးတဲ့ မြန်မာစာရေးထုံးကျမ်းမှာ ပထမ = တခုမြောက် (သင်သကရိုက်သက် စကား) လို့ ရေးထားတယ်။

ပဌမ နဲ့ ပထမ တို့ဟာ မြန်မာစာစစ်စစ်မဟုတ်။ ပါဠိနဲ့ ဆန်းစကရစ် ခေါ် သင်္သကရိုက် ခေါ် သက္ကတကနေလာတာဖြစ်လို့ ဘယ်လိုရေးရေး မှန်တယ်။

၁-၂-၃ ဆိုတာ ဂဏန်းတွေဖြစ်တယ်။ ဂဏန်းတိုင်းမှာ ယူနစ် ခေါ် တန်ဖိုးတမျိုးမျိုးပါမှသာ အဓိပ္ပါယ်ရှိတယ်။ ဥပမာ ၁ ပေ၊ ၂ ယောက်၊ ၃ ဒီဂရီ စသည်။

တစ်ကိုသဘောကျသူတွေက ရေတွက်လို့ရရင် တစ်ဆိုပြီးပြောနေ သင်ပေးနေကြတယ်။ ဂဏန်းနဲ့ ရေတွက်လို့ရတာ မတူပါ။ ဂဏန်းကို တစ်ရေးပါဆိုတာက သင့်မှန်တယ်။ မန်းနီး ခေါ် ပိုက်ဆံဆိုတာ အင်္ဂလိပ်စာမှာ ရေတွက်မရလို့ဆိုပေမဲ့ မြန်မာစာမှာ တမျိုး။ ကျပ်ငွေ ဒင်္ဂါးနဲ့ စက္ကူတွေ စထုတ်ကတည်းက တကျပ်၊ တဆယ်ကျပ်၊ တရာကျပ်လို့ ရိုက်နှိပ်ခဲ့ပါတယ်။

(၁) ကြိမ်နဲ့  (၁) ကြိမ်မြောက် မတူပါ။ စာဖတ်နေတာ (၂) နာရီကြာပြီလို့ရေးရတယ်။ ပဌမတနာရီမှာ စိတ်ဝင်စားခဲ့ပြီး၊ ဒုတိယနာရီမှာ စိတ်မဝင်စားတော့ပါလို့ ရေးရတယ်။

သတိပေးတာ (၂) ကြိမ်ရှိပြီလို့ ရေးရတယ်။ (၂) ကြိမ်မြောက် သို့မဟုတ် ဒုတိယအကြိမ်သတိပေးခြင်းလို့ ရေးရတယ်။

အင်္ဂလိပ်လို နေ့စွဲရေးတဲ့အခါ (၁) ရက်လို့ မရေးရပါ။ ပဌမနေ့၊ ဒုတိယနေ့လို့ ရေးရတယ်။ ၉ ရက်မြောက်နေ့လို့ ရေးရတယ်။ ခရီးထွက်သွာတာ ၉ ရက်ကြာပြီလို့ ရေးရတယ်။ မြန်မာလိုတော့ ကနေ့ ဖေဖေါ်ဝါရီလ နဝမနေ့လို့ ပြောတာမှန်ပေမဲ့ ပြောလေ့ရေးလေ့ မရှိပါ။ ၉ ရက်နေ့လို့သာ သုံးပါတယ်။

ကျွန်တော်တို့ဟာ မြန်မာ၊ ပါဠိ၊ သက္ကတနဲ့ အင်္ဂလိပ်စာတွေကို အဆင်သင့်သလို သုံးနေကြရတယ်။ တခါတခါ တခြား ဘာသာစကားတွေပါ ပါလာသေးတာ။ တရားသေပြောတာ မမှန်တတ်ပါ။ မြန်မာစာကို အမိန့်ပေးပြီး ပြင်ခိုင်တာ မှားတယ်။

ဒေါက်တာတင့်ဆွေ
၉-၂-၂၀၁၉