H1N1 influenza virus vaccine တုပ်ကွေး ကာကွယ်ဆေး
လူတွေတယောက်ဆီကနေတယောက် ပါးစပ်ကနေလာတဲ့ အမှုံအမွှားလေးတွေကနေတဆင့် ကူးစက်တယ်။ ချောင်းဆိုး နှာချေရာကနေထွက်လာတယ်။ လေထဲရောက်မယ်။ မျက်နှာပြင်တွေနဲ့ အသုံးအဆောင်တွေပေါ်ရောက်တယ်။ နောက်တယောက်က ရှူမိရင် ကူးစက်နိုင်တယ်။ ပိုးရှိသူကိုယ်မှာလည်းရှိနေနိုင်တယ်။ သူ့လက်နဲ့ထိကိုင်တာတွေမှာ ပိုးရောက်စေနိုင်တယ်။
H1N1 influenza virus vaccine ကာကွယ်ဆေးရှိတယ်။ ၂ဝဝ၉ မှာ ကမ္ဘာမှာကပ်ရောဂါဖြစ်စဉ်ကစသုံးနေတယ်။ ထိုးဆေးဖြစ်တယ်။ ဗိုင်းရပ်စ်ကိုသေအောင်လုပ်ထားတာကိုသုံးတယ်။ နောက်ထပ် LAIV (Nasal spray vaccine) နှာခေါင်းထဲဖြန်းရတဲ့ကာကွယ်ဆေး ပေါ်လာတယ်။ ဗိုင်းရပ်စ်အရှင်သုံးတယ်။ ထိုးဆေးက အသက် ၆ လကနေအထက် ထိုးတယ်။ ဒီကာကွယ်ဆေးက တခြားဗိုင်းရပ်စ်တွေ ဥပမာ Bird flu ကြက်ငှက်တုပ်ကွေးကို မကာကွယ်ပါ။
ကာကွယ်ဆေး ဘေးထွက်သက်ရောက်မှု နည်းနည်းသာရှိတယ်။ တုပ်ကွေးမိသလိုခံစားရနိုင်တယ်။ ကိုယ်နည်းနည်းပူ၊ လည်ချောင်းနာ၊ နှာစေး၊ အစားပျက်၊ ကြွက်သားတွေနာ။ တုပ်ကွေးရာသီမှာ တုပ်ကွေးမိသလိုခံစားရတိုင်း ဒီရောဂါလို့ မပြောနိုင်ပါ။ ကြက်ဥနဲ့မတည့်သူတွေ ဒီကာကွယ်ဆေးမတည့်ပါ။ Guillain-Barré syndrome ခေါ်အာရုံကြောရောဂါရှိသူ မတည့်ပါ။ အအေးမိ ကိုယ်ပူနေချိန်မှာလည်း ကာကွယ်ဆေးထိုးနိုင်ပါတယ်။
တိတိကျကျပြောရရင် ဒီကာကွယ်ဆေးဟာ 2009 H1N1 influenza virus ဗိုင်းရပ်စ်ကို ကာကွယ်တာဖြစ်တယ်။ ၂ဝဝ၉-၂ဝ၁ဝ တုန်းကဖြစ်ခဲ့တဲ့ တုပ်ကွေးဗိုင်းရပ်စ်ကိုကာကွယ်တာ။ ၁ဝ နှစ်အထက်ကို ကာကွယ်ဆေးတလုံး တကြိမ်ထိုးရတယ်။ အသက် ၆ လကနေ ၉ နှစ်ကို ကာကွယ်ဆေး ၂ ကြိမ်ထိုးရမယ်။ တကြိမ်နဲ့တကြိမ် ၄ ပတ်ခြားတယ်။ ၆ လအောက်မလိုပါ။
ကာကွယ်ဆေးထိုးချိန်တူနေရင် Pneumococcal polysaccharide vaccine နူမိုကော်ကယ်ကာကွယ်ဆေးကိုလည်း တပြိုင်တည်းထိုးနိုင်တယ်။ နှာခေါင်းထဲဖြန်းဆေးလည်း အတူတူဖြစ်တယ်။
H1N1 တုပ်ကွေး ကာကွယ်ရေး
၁။ နေမကောင်းရင် အိမ်မှာသာနေထိုင်ပါ။ အဖျားပျောက်ပြီး ၂၄ နာရီအထိ အပြင်မထွက်ပါနဲ့။ ကိုယ့်ရောဂါ သူများတွေကို မပေးပါနဲ့။ လူတွေနဲ့ထိတွေ့တာ နည်းပါစေ။ ရောဂါလိုက်ရှာသလိုမဖြစ်အောင် ရောဂါမရသေးသူတွေက လူစုလူဝေးရှောင်ပါ။
၂။ လက်မကြာခဏဆေးပါ။ ရေ + ရိုးရိုးဆပ်ပြာသုံးပါ။ ရေနဲ့ဝေးရင် Alcohol-based hand sanitizer ဟင်းဆင်နတိုက်ဇာ ဆေးရည်သုံးပါ။ လက်ကိုမကြာခဏဆေးပါ။ အထူးသဖြင့် ချောင်းဆိုး နှာချေပြီးတိုင်းဆေးပါ။
၃။ ချောင်းဆိုးတိုင်း၊ နှာချေတိုင်းမှာ နှာခေါင်းကို ဖုံးအုပ်ထားပါ။ နှာခေါင်းစည်းသုံးပါ။ တစ်ရှူးသုံးပါ။ စနစ်တကျစွန့်ပါ။ တံတောင်ဆစ်ထဲချောင်းဆိုးတဲ့အကျင့်လုပ်ပါ။
၎။ ထိတွေ့မှု နည်းနိုင်သမျှနည်းပါစေ။ လူများရာကို မသွားပါနဲ့။ အသက် ၅ နှစ်အောက်နဲ့ ၆၅ နှစ် ကျော်သူတွေ ပိုသတိထားပါ။
၅။ ကြမ်းပြင်၊ မျက်နှာပြင်နဲ့ အသုံးအဆောင်တွေမှာ ရောဂါရှိသူဆီက နှာချေ ချောင်းဆိုးရာကနေထွက်လာတဲ့ ဗိုင်းရပ်စ်တွေ ကပ်နေနိုင်တယ်။ လက်နဲ့ မျက်စိ၊ နှာခေါင်း၊ ပါးစပ်ကို ထိကိုင်တာ သတိထားပါ။ လက်မှာ ပိုးတွေပါနေနိုင်တယ်။
၆။ Flu vaccination ကာကွယ်ဆေးကို အသက် ၆ လအထက်ထိုးနိုင်တယ်။ ဗိုင်းရပ်စ် ၂-၃ မျိုးကိုပါကာကွယ်မယ်။ ထိုးဆေး + နှာခေါင်းထဲထည့်ဆေးလို့ ၂ မျိုးလာတယ်။ နှာခေါင်းထဲထည့်ဆေးကိုတော့ အသက် ၂ နှစ်ကနေ ၄၉ နှစ်အထိ ကိုသာပေးတယ်။ ကိုယ်ဝန်ဆောင်ကို မပေးရပါ။ ကြက်ဥနဲ့မတည့်သူတွေ မပေးရပါ။ HIV ရှိသူတွေနဲ့ ပန်းနာရှိသူတွေ မပေးရပါ။
၇။ ကျောင်း-ရုံး ပိတ်သင့် မသင့် ကျန်းမာရေးဌာနက ဆုံးဖြတ်တာလိုက်နာပါ။
၈။ လိုတာထက် ပိုမစိုးရိမ်ပါနဲ့။ ကျန်းမာရေးဌာန တာဝန်ရှိသူတွေကပြောတာမဟုတ်ရင် မယုံပါနဲ့။ သတင်းအမှားတွေ မျှဝေတာ မလုပ်ပါနဲ့။ ဗိုင်းရပ်စ်စားဆေးတွေနဲ့ ကာကွယ်လို့မရပါ။ ရောဂါ ၃ မျိုးကာကွယ်ဆေး မဟုတ်ပါ။ Monovalent တမျိုးတည်းကာကွယ်ဆေးလို့ခေါ်တယ်။ ကာကွယ်ဆေး၊ ထိုးဆေး၊ စားဆေးကြော်ငြာတွေ သတိထားပါ။
ဒေါက်တာတင့်ဆွေ
၂၅-၇-၂ဝ၁၇
နံနက် ၁၁ နာရီ၊ ၅ဝ မိနစ်။
Comments
Post a Comment