Waxing and Waning လဆန်းလဆုတ် သို့မဟုတ် ပျူစာ၏ဇာတ်သိမ်းခန်း
ကျွန်တော်က ခေတ်အောက်သွားပြီ။ ကိုယ်ပိုင်အတွေ့အကြုံလေးတော့ နည်းနည်းရေးချင်လာတယ်။ မြန်မာလူငယ်ထု သန်း (၃ဝ) ထဲက တယောက်သာဖြစ်ပါတယ်။ ခေတ်ကလည်း အနှစ် (၃ဝ) ကျော်ပြီ။
ငယ်စဉ်က စာအကုန်ဖတ်ခဲ့တယ်။ အကုန်ဆိုတာ လက်လှမ်းမီတာသာပြောတာပါ။ အကိုကြီးက ကျွန်တော့်ထက်သာတယ်။ စာအုပ်တွေလိုက်ရှာဝယ်ပြီး စုဆောင်းထားတာ ထင်ရှူးသေတ္တာကြီးနဲ့ ၄-၅ လုံးရှိတယ်။ (၁ဝ) ပြားတန် ဗားမားစတား၊ (၂၅) ပြားတန် မော်ဒန်ကာတွန်း၊ ပြား (၆ဝ) တန် ရွှင်ပျော်ပျော်အစ၊ (၁) ကျပ်တန် သောကြာ၊ သင့်ဘဝ၊ (၂) ကျပ်တန် မဂ္ဂဇင်းအစုံ၊ အောင်လင်း၊ တက္ကသိုလ်ဘုန်းနိုင်၊ ဒဂုံရွှေမျှား၊ ပီမိုနင်း၊ ရွှေဥဒေါင်း၊ ကိုင်ရိုဗေဒင်။ ရွေးဖတ်တာလို့တော့ ပြောမရပါ။ ရှိတာသာ ဖတ်တာပါ။
(၁၅) ပြားတန်တံဆိပ်ခေါင်းဖိုးသာကုန်တဲ့ သံရုံးအားလုံးက အခမဲ့ပို့ပေးတဲ့ စာအုပ်အကုန်လည်းဖတ်တယ်။ အဲတာမှာ ကျွန်တော်ကမှ ဘက်မလိုက်အစစ်။ စစ်အေးခေတ်မှာ လက်ဝဲရော၊ လက်ျာပါဖတ်တယ်။ အစိုးရဝါဒဖြန့် စာအုပ်မှန်သမျှ ဖတ်ပါတယ်။ ကွန်မြူနစ်စာဆိုတာ ပြေးမလွတ်ပါ။ စာရေးဆရာ ကဗျာဆရာတိုင်းလိုလိုဟာ မနီရင် စာလို့မထင်တဲ့ခေတ်ကို ကောင်းကောင်းကြီး မီလိုက်တယ်။ ကွန်မြူနစ် ချစ်ရကောင်းမှန်းတော့ မသိပါ။ ကွန်မြူနစ် ဆန့်ကျင်ရေး လူထုအောင်သံကို (၆) ခါထက်မနည်း ကြည့်ဖူးတယ်။ ကွန်မြူနစ် မုန်းရကောင်းမှန်း မသိခဲ့ပါ။ (ဖဆပလ) ခေတ်မှာ ရွေးကောက်ပွဲမဲဆွယ်တဲ့ အဝါကာတွန်း၊ အနီလုံးချင်းဖတ်ရတယ်။ သာသာရေးမှာ တရားဝင်ဂိုဏ်းကြီး (၉) ခု မတိုင်ခင်ကတည်းက ဂိုဏ်းအစုံက စာအစုံ ဖတ်ခဲ့ရတယ်။
ဖတ်ဖူးတာ ကြွားနေတာတော့မဟုတ်ပါ။ လူငယ်တွေဟာ ခေတ်ကနေ သင်ပေးတာခံကြရတယ်။ (မဆလ) ခေတ်မှာတော့ ရွေးစရာ မရှိခဲ့ပါ။ စစ်အစိုးရတွေက အဲတာထက် ဆိုးတယ်။ အမှန်တွေကို အမှားပြင် ရေးတာတွေသာ ဖတ်စေခဲ့တယ်။ သတ်ပုံကအစ ပြင်ခိုင်းတယ်။
အဲဒီမြေဆီပေါ်မှာ အဲလိုမြေသြဇာနဲ့ ကြီးလာသူတွေက အခုဆို မြန်မာစာဆရာတွေ၊ စာရေးဆရာတွေ၊ ကဗျာဆရာတွေ၊ အယ်ဒီတာတွေ ဖြစ်လာကြပါတယ်။ မြစေတီကျောက်စာထဲက မြန်မာစာလည်း ပျူစာဇာတ်သိမ်းခန်းလို ဖြစ်တော့မလား။
ဒေါက်တာတင့်ဆွေ
၂၇-၇-၂ဝ၁၆
၂၇-၇-၂ဝ၁၇
Comments
Post a Comment