မြန်မာနိုင်ငံသားတွေ ဘယ်မှာနေနေ ကျန်းမာကြပါစေ

Photo taken on 19-11-2011 by an Indian photo-journalist at Yamuna Clinic
This Blog is created on 10th October 2014

How to ask ကျန်းမာရေးနဲ့ ဆေးပညာ မေးလိုတာရှိပါက

• ဖေ့စ်ဘွတ် ကွန်မင့်ကနေ မမေးပါနဲ့။
• ဖြစ်တဲ့သူရဲ့ ကျား-မ နဲ့ အသက်ကို အရင်ဆုံးရေးပါ။ နာမည် မလိုအပ်ပါ။
• ဖြစ်နေတာ ၁-၂-၃။ ဖြစ်တာဘယ်လောက်ကြာပြီ။ လိုအပ်ရင် ရာသီ၊ အိမ်ထောင်ရေး၊ ကျန်းမာရေးနောက်ခံ၊ နေတဲ့တိုင်းပြည်။ တိုတိုရှင်းရှင်းသာရေးပါ။
• ဆေးစစ်ချက်တွေနဲ့ ပုံတွေကို အတည့်ပို့ပါ။ လိုတာကိုသာပို့ပါ။ အာလ်ထွာဆောင်းမှာ ပုံမလိုပါ။ မှတ်ချက်သာလိုတယ်။
• SMS အရေးအသားမျိုးကို မဖတ်တတ်ပါ။ မြန်မာစကားကို အင်္ဂလိပ်စာလုံးနဲ့ရေးတာကို မဖတ်ပါ။
• ဖုန်းဆက်ပြီးမေးရင် အချိန်ဇုန်မတူတာရော၊ အသံထွက်လွဲနိုင်တာရောကြောင့် အဆင်မပြေပါ။
• မေးတဲ့သူက မိမိကိုယ်မိမိ သား-သမီးလို့မရေးပါနဲ့။ ဖြေမယ့်ဆရာဝန်ကို ဆရာလို့သာသုံးပါ။
• ဆေးရုံ-ဆေးခန်း-ဆရာဝန်-ဆေးဆိုင်-ဆေးဈေး-ကုန်ကျစရိတ် စတာတွေကို မသိပါ။
• မေးစရာနေရာ (၁) အီးမေးလ် doctortintswe@gmail.com (၂) ဖေ့စ်ဘွတ် https://www.facebook.com/tint.swe.dr (၃) ဖေ့စ်ဘွတ် https://www.facebook.com/drtintswe/
• မေးနည်းစည်းကမ်းအရ မမေးလိုသူများ http://doctortintswe.blogspot.com/ Dr. Tint Swe's Writings မှာ ရှာဖတ်နိုင်ကြပါတယ်။

Monday, May 16, 2016

Kegel Exercise for Women (ကီဂယ်လ်) လေ့ကျင့်ခန်း

တသားမွေးတသွေးလှဆိုတာ အပေါ်ယံကြည့် ပြောကြတာများတယ်။ အတွင်းအင်္ဂါတွေပါ ကျန်းမာသန်စွမ်းဘို့ လိုသေးတယ်။ အမျိုးသမီး ကြီးငယ်မဟူ၊ အပျိုရော အအိုပါ၊ တဒ်ါလာမှ မကုန်ဘဲ၊ အထဲက အင်္ဂါမှန်သမျှ ပြန်ကောင်းအောင် လုပ်လို့ရတဲ့နည်း။ အသုံးများပေမဲ့ အသစ်နဲ့မခြား အားကောင်းနေစေမဲ့နည်းကို ရေးပါမယ်။

ကိုယ်ဝန်တခါဆောင်ရင်တခါ အတွင်းအင်္ဂါတွေ အားနည်းလာတယ်။ ကြာရင် အိမ်ထောင်ရေးကိုပါ ထိခိုက်နိုင်တယ်။ ကိုယ့်ကိုယ်ကို သိမ်ငယ်စိတ်ဝင်နိုင်တယ်။ စားဆေး-ထိုးဆေးနဲ့ မရပါ။ နတ်ရေကန်ထဲလဲ ဆင်းမရ၊ Pelvic floor exercises လုပ်မှ ကောင်းတယ်။ တင်ပါးဆုံအောက်ခံ လေ့ကျင့်ခန်းဖြစ်တယ်။ သားအိမ်ကျတာ၊ ဆီးအိမ်ကျတာ၊ အစာဟောင်းအိမ်ကျ၊ ဆီးမထိန်းနိုင်တာ၊ ဒီလိုရောဂါတွေသာမက (ဗဂျိုင်းနား) ကြွက်သားတွေ အားပျော့နေတာလဲ ကျန်းမာရေးနဲ့လူမှုရေး ပြဿနာပဲ။ အိမ်ထောင် မကျသေးသူတွေလဲ တချို့ဖြစ်တတ်လို့ ငါန်းဇွန်နယ်မှာ အပျိုလေးတယောက်ကို ခွဲတောင်ပေးခဲ့ရဖူးတယ်။

တင်ပါးဆုံအရိုးကွင်းထဲမှာ အင်္ဂါတွေအများကြီးရှိတယ်။ ယောက်ျား-မိန်းမ နည်းနည်းမတူကြဘူး။ လူတယောက်ကို တဖက် မျက်နှာမူမှာ ရပ်ခိုင်းပြီး ဘေးတည့်တည့်ကနေကြည့်ရင် ရှေ့ဆုံးမှာ ဆီးစပ်ရိုး၊ နောက်မှာ ဆီးအိမ်၊ နောက်မှာ မိန်းမတွေမှာ သားအိမ်၊ နောက်ဆုံးမှာ အစာဟောင်းအိမ်ရှိတယ်။ မိန်းမတွေမှာ သားအိမ်အောက်ကတဆက်တည်း (ဗဂျိုင်းနား) မွေးလမ်းကြောင်းရှိတယ်။ အစာဟောင်းအိမ်အောက်က ဆက်နေတာက စအို။ ယောက်ျားတွေမှာ ဆီးအိမ်အောက် ကပ်နေတဲ့ ဆီးကျိတ်ရှိတယ်။

ဒီအင်္ဂါတွေကို သူ့နေရာသူ ပုံမှန်ရှိနေအောင် ကြွက်သား၊ အရွတ်ပြားတွေကနေ ထိန်းပေး-တည့်ပေး၊ မ, ပေးထားတယ်။ ထိန်း-တည့်-မ လုပ်ပေးတာတွေ အားနည်းလာရင် ပြောခဲ့သလို အမျိုးမျိုး ဖြစ်လာစေနိုင်တယ်။ ကြွက်သားဆိုတာ လေ့ကျင့်ပေးရင် သန်မာစေနိုင်လို့ လေ့ကျင့်ပေးရမယ်။

အရင်ဆုံး ဘယ်ကြွက်သားတွေကို လေ့ကျင့်ရမလည်းသိအောင် လုပ်ရတယ်။ ဆွဲကိုင်ထောက်ပြ မရနိုင်လို့ သင်ပြပေးရတယ်။ ဆီးသွားနေရင်း ဆီးမကုန်ခင်မှာ ဆီးသွားတာ ရပ်သွားအောင် ကြိုးစားကြည့်ပါ။ ဘယ်နေရာကို ညှစ်ပြီး မ, တင်ပေးရင် ဆီးရပ်မလည်းဆိုတာ ကိုယ်တိုင်သိလာလိမ့်မယ်။ စအိုနဲ့ မွေးလမ်းပေါက်တွေကို ပိတ်ပြီး ဆွဲတင်သလို လုပ်ရတယ်မဟုတ်လား။ အဲတာတွေလိုသိရင် အဲတာတွေကို ညှစ်လိုက် လျှော့လိုက်လုပ်ရတယ်။ အထက်နဲ့ အတွင်းထဲဆီကို ဦးတည်ရတယ်။

အဲလိုလေ့ကျင့်နေတုံးမှာ တင်ပါးကို ဆွဲတင်တာ လှုတ်တာ မဖြစ်စေပါနဲ့။ ပေါင်-ခြေတွေလဲ ညှစ်တာမျိုး မလုပ်ရပါ။ အသက်အောင့်စရာ မလိုပါ။ သက်တောင့်သက်သာ အနေအထား (လှဲနေရင်း) စလုပ်ပါ။ အဆင်ပြေလာတဲ့အခါ ထိုင်ရင်းလုပ်ပါ။ နောက်ဆိုရင် အလုပ်လုပ်နေရင်းလဲ လုပ်ပါ။ ကွန်ပြူတာနဲ့ စမတ်ဖုန်းသုံးနေရင်းလည်းလုပ်ပါ။ အချိန်မရွေးလုပ်နိုင်ပါတယ်။ ကြွက်သားတွေကို ညှစ်ထိန်းထာတာကို အစမှာ ၂ စက္ကန့်၊ နောက် ၁ဝ စက္ကန့်ကြာအောင် ကြိုးစားပါ။

ကျွမ်းကျင်လာရင် ဗိုလ်သင်တန်းတက်မယ်။ အသက် မှန်မှန်ရှူပါ။ ကြွက်သားတွေကို ဆွဲတင်ပြီးနောက် ပြန်လျှော့ချတာကို ဇတ်ကနဲလုပ်လိုက်ပါ။ တင်းတာထက် ချတာကမြန်ပါစေ။ ၁ဝ ကြိမ် ဆက်တိုက်လုပ်ပါ။ တခါလုပ် ၈-၁ဝ ကြိမ်၊ တနေ့မှာ ၃ ခါလုပ်ပါ။ တကယ်လို့ ကိုယ့်မှာ ဆီးအိမ်ကျတာမျိုးရှိလို ပြုပြင်ရသူဆိုရင် ပိုလုပ်ရပါမယ်။ သားအိမ်ကျချင်နေတာ၊ ဗဂျိုင်းနားထဲမှာ တစ်ဆို့ဆို့ ဖြစ်နေတာ၊ ဗဂျိုင်းနားတင်းအား လျှော့နေတာတွေကိုပြောတာဖြစ်တယ်။

ကိုယ်ဝန်ဆောင်နေချိန်မှာပါ လုပ်သင့်တယ်။ ဆီးမထိန်းနိုင်တဲ့ရောဂါ Stress urinary incontinence ကိုပါ ကုနိုင်တယ်။ ပိုဆိုးတဲ့ Urge urinary incontinence ကိုတော့ မရနိုင်ပါ။

အမျိုးသမီးတိုင်းမှာ သတိထားစရာတွေ ရှိတယ်။ ဝမ်းချုပ်လို့ ညှစ်ရတာ၊ အလေးအပင် မတာ၊ ချောင်းဆိုး၊ နှာချေ၊ ရီမောတဲ့အခါမျိုးတိုင်းမှာပါ တင်ပါးဆုံရိုးကွင်းထဲက အင်္ဂါတွေကို စိတ်ကနေထိန်းပေးထားရမယ်။ လက်လွတ်စပယ် မလုပ်ပါနဲ့။ ဆောင့်ကြောင့် မထိုင်ပါနဲ့။ ဒူးကို ၉ဝ ဒီဂရီ ထားလို့ရတဲ့ အိမ်သာမျိုးသာသုံးပါ။ ပက်လက် အိပ်နေရင်း ခြေထောက်မြှောက်တာကို ၂ ဖက်လုံး တပြိုင်နက်မလုပ်ပါနဲ့။ လုပ်ရရင်လဲ သတိရှိပါ။ မတ်တပ်ရပ်နဲ့ ခြေ ၂ ဖက်ဆန့်ပြီး ခါးကုံးတာမျိုး ဆင်ခြင်ပါ။ တင်ပါးဆုံရိုးကွင်းထဲကအင်္ဂါတွေကို တွန်းထုတ်သလို မဖြစ်စေနဲ့။ ဆီးအိမ်တင်းနေမှသာ ဆီးသွားပါ။

ဝမ်းမချုပ်ပါစေနဲ့။ ဒါပေမဲ့ ဝမ်းနုတ်ဆေး ခဏခဏမသောက်ပါနဲ့။ သင်္ဘောသီး၊ မန်ကျီးသီးမှည့်နဲ့ ဝမ်းသွားအောင် လုပ်ပါ။ ဝမ်းနုတ်ဆေးသောက်လို့ဖြစ်ဖြစ်၊ ဝမ်းပျက်လို့ဖြစ်ဖြစ်၊ အရက်နာကျတာဖြစ်ဖြစ် ပိုတက်ဆီယမ်ဓါတ် နည်းစေတယ်။ ကြွက်သားတွေ အားပြော့မယ်။ ဓါတ်ဆားရည်သောက်ပါ။ ရေနွေးကြမ်းသောက်ပါ။ အုန်းရည်သောက်ပါ။ ငှက်ပျောသီး၊ လိမ်မော်သီးစားပါ။ လိုအပ်ရင် ပိုတက်ဆီယမ်ဆေးသောက်ပါ။

စိတ်လည်း လှပါစေ၊ ကိုယ်လည်း အပြင်ကရော အတွင်းထဲကပါ လှကြပါစေ။

Dr. တင့်ဆွေ

No comments:

Post a Comment

Note: Only a member of this blog may post a comment.