Hypertension (1) သွေးတိုးရောဂါ (၁)

၁။ ဆရာရှင့် ကျွန်မအမေရဲ့ကျန်းမာရေးအတွက်မေးချင်လို့ပါရှင့်။ မေမေကအသက် ၅၅ နှစ်။ အိမ်ထောင်ရှိ။ အိမ်ထောင်သက် ၃၃ နှစ်။ သမီး ၃ ယောက် အငယ်ဆုံးက ၂၄ နှစ်ပါ။ သားအိမ်မှာအကျိတ်တည်လို့ လွန်ခဲ့တဲ့ ၇ နှစ်ကသားအိမ်ထုတ်ထားပါတယ်။ လွန်ခဲ့တဲ့ ၇ နှစ်လောက်ကစပြီးသွေးတိုးရှိမှန်းစသိတာပါ။ ဆရာဝန်ကြီးက Amlodipine 5mg နေ့စဉ်သောက်ခိုင်းပါတယ်။ အခုရက်ပိုင်းမှ ဆေးသောက်ပေမယ့် သွေးက 180/120 အဲ့လိုတွေဖြစ်နေပါတယ်ရှင့်။ Tab Nafidipine 20 mg သောက်တော့ Bp 130/85 လောက်ဖြစ်သွားပါတယ်။ သွေးဖိအား အဆင်ပြေပေမယ့် မောမောနေပြီး ခေါင်းတခြမ်း ကိုက်နေလို့ပါဆရာ။ ခြေလက်ရုတ်တရက်အလှည့်အပြောင်းမှာ အကြောကပ်သလို အကြောတင်သလိုမျိူး ဖြစ်နေပါတယ်ဆရာ။ ဘာကြောင်းဖြစ်တတ်ပါသလဲဆရာ။ စိုးရိမ်ရပါသလားရှင့်။ အရင်ကနှလုံးရောဂါတော့မရှိပါဘူးရှင့်။ ဖြေဖို့အဆင်ပြေရင်ဖြေကြားပေးစေချင်ပါတယ်ရှင့်။ ဆရာတို့မိသားစုကျန်းမာချမ်းသာပါစေ။

၂။ ကောင်းသောနေ့လေးပါဆရာ။ ကျွန်မ အသက်၂၆ ပြည့်သွားပါပြီ။ အိမ်ထောင်ရှိ။ ဒီနေ့ဆေးခန်းမှာ OG နဲ့ပြတာ သွေးပေါင်ချိန်တာ အပေါ်သွေး ၁၅၀။ အောက်သွေး ၁၀၀ လို့ပြောပါတယ်။ OG က သွေးတိုးလို့ဟိုမုန်း ၁မျိုးပါတဲ့လစဉ်တားဆေးပဲပေးလိုက်ပါတယ်။ ကျွန်မအရင်က သွေးမတိုးဖူးပါဆရာ။ သွေးမတိုးအောင် ဆေးသောက်လို့ရမယ်ဆိုရင် ဆရာဆေးလမ်းညွန်ပေးပါ။ အခု ဟိုမုန်း ၁မျိုးပါတဲ့ဆေးသောက်ရင် ရာသီမမှန်ပြီး ထိန်တတ်တယ် လည်းပြောလို့ပါဆရာ။ အရင်ကတည်းက ကျွန်မ ရာသီလာတာ နည်းပါတယ်။ ၁ရက်ခွဲ ၂ရက်သာ လာပါတယ်။ ဟိုမုန်း ၂မျိုးဆေးပဲသောက်ချင်လို့ ဆရာ။ သွေးတိုးကျအောင် ဆေးပြောပြပေးပါ လားဆရာ။ စာရှည်သွားလို့ ခွင့်လွှတ်နားလည်ပေးပါ ရှင်။

တကမ္ဘာလုံးမှာ သွေးတိုးရှိနေသူပေါင်း ၁ ဘီလီယမ်လောက်ရှိနိုင်တယ်။ သွေးလွှတ်ကြောထဲမှာ ဖိအားတွေ များနေတာကို ခေါ်ပါတယ်။ သွေးဖိအားအဖြေမှာ အထက်ဂဏန်းနဲ့ အောက်ဂဏန်းဆိုပြီးရှိတယ်။ အထက်ဂဏန်းဆိုတာ နှလုံးက သွေးတွေကို ညှစ်ထုတ်လိုက်ချိန်မှာ ရှိနေတဲ့ သွေးလွှတ်ကြောထဲရှိတဲ့ ဖိအားဖြစ်ပြီး၊ အောက်ဂဏန်းကတော့ သာမန်အချိန်မှာရှိနေတဲ့ ဖိအားဖြစ်တယ်။ သွေးဖိအားကို ၅ မိနစ်ခြား ၂ ခါတိုင်းတာ ကောင်းတယ်။

• ပုံမှန် = အပေါ်ဂဏန်း ၁၂ဝ နဲ့အောက်၊ အောက်ဂဏန်း ၈ဝ နဲ့အောက်၊
• သွေးတိုး ရှိချင်သလို အဆင့် = အပေါ်ဂဏန်း ၁၂ဝ-၁၃၉၊ အောက်ဂဏန်း ၈ဝ-၈၉၊
• သွေးတိုး အဆင့် (၁) = အပေါ်ဂဏန်း ၁၄ဝ-၁၅၉ အောက်၊ အောက်ဂဏန်း ၉ဝ-၉၉၊
• သွေးတိုး အဆင့် (၂) = အပေါ်ဂဏန်း ၁၆ဝ နဲ့အထက်၊ အောက်ဂဏန်း ၁ဝဝ နဲ့အထက်။

နှစ်မျိုးရှိပါတယ်။ ၉ဝ-၉၅% မှာ အကြောင်းရင်းတိတိကျကျမသိရဘဲဖြစ်တယ်။ Essential hypertension လို့ ခေါ်တယ်။ Secondary hypertension ခေါ် အမျိုးအစားမှာတော့ ကျောက်ကပ်ရောဂါ၊ သွေးလွှတ်ကြောမကြီးရောဂါ၊ ကျောက်ကပ် အထက်မှာရှိတဲ့ အဒြီနယ်လ်ဂလင်းရောဂါတွေကြောင့် ဖြစ်ရတယ်။ အနာအကိုက်ပျောက်ဆေးနဲ့ စတီရွိုက်ဆေးတွေ ကြောင့်လဲ ဖြစ်နိုင်တယ်။ ကိုယ်ဝန်ဆောင် ၁ဝ% မှာလဲ ဖြစ်တတ်တယ်။ အအိပ်ပျက်ရင်လည်း ဖြစ်တတ်တယ်။

ဘာလက္ခဏာမှမပြသူက ပိုများတယ်။ ခေါင်းမူး၊ ခေါင်းကိုက် မျက်စိဝါး၊ အန်တာဖြစ်နိုင်တယ်။ သွေးထဲမှာ Creatinine များနေတာကို စမ်းတွေ့ရမယ်။ ဆီးထဲမှာလဲ ပရိုတင်းပါနေနိုင်တယ်။ အသက် ၄ဝ-၇ဝ နှစ်ကြား လူတွေ အထက်သွေး ၂ဝ တိုးတိုင်း၊ အောက်သွေး ၁ဝ တိုးတိုင်း နှလုံးသွေးကြောရောဂါဖြစ်စရာ ၂ ဆ တိုးလာတယ်။

နာတာရှည်သွေးတိုးဖြစ်လာရင်၊ သွေးလွှတ်ကြောလေးတွေရဲ့နံရံတွေ ထူပြီးမာလာမယ်၊ နှလုံးသွေးလွှတ်ကြောကျဉ်းလို့ နှလုံးသွေးကြောကျဉ်းပိတ်နိုင်တယ်၊ အဲလိုဖြစ်လို့ ရင်ပတ်အလွန်နာတာကို Heart attack ရတယ်လို့ခေါ်တယ်။ အလုပ်ပိုလုပ်ရလို့ နှလုံးကြီးလာမယ်။ Diastolic dysfunction, CHF, Cardiac arrhythmias နှလုံးရောဂါတခုခု ဖြစ်နိုင်တယ်၊ ၂၅% မှာ ECG နဲ့ သိနိုင်တဲ့ နှလုံးဘယ်ဘက်အောက်ခန်းကြီးတာ ဖြစ်တတ်တယ်။ ဦးနှောက်သွေးကြောကျဉ်း-ပိတ်-သွေးယိုလို့ ဦးနှောက် အလုပ်မလုပ်နိုင်တော့ဘဲ လေဖြတ်တာကို Stroke ရတယ်လို့ ခေါ်တယ်။ ၈၅% က သွေးလွှတ်ကြောလေးတွေ ကျဉ်းပြီးဖြစ်ရတယ်။ ၁၅%က သွေးယိုလို့ ဖြစ်ရတယ်။ မှတ်ဥာဏ်ချို့တဲ့မှုလဲ ဖြစ်နိုင်တယ်။ မျက်စိထဲက အရုပ်ထင်တဲ့နေရာ Retina သွားတဲ့သွေးလွှတ်ကြောတွေကို ထိခိုက်နိုင်တယ်။ ကျောက်ကပ်ရောဂါ ဝင်လာနိုင်တယ်။ ခြေဖျားလက်ဖျားသွေးမလျှောက်လို့ Gangrene အနာဖြစ်တတ်တယ်။

ဆရာဝန်တွေက အတော်ညံ့ကြတယ်။ ပျောက်အောင်မလုပ်နိုင်သေးပါ။ သွေးတိုးရှိ-မရှိ စောစောစီးစီးသိရင် ကောင်းတယ်။ နောက်ဆက်ရောဂါတွေမဖြစ်အောင်ကာကွယ်နိုင်မယ်။ သွေးကျဆေးအမျိုးမျိုးရှိတယ်။ အလွန် အရေးပါတာ အစားအစာ၊ ဆေးလိပ်၊ အရက်၊ ကော်ဖီ၊ ဝတာတွေက ပိုဆိုးစေသည်။ လေ့ကျင့်ခန်းလုပ်ရင် သက်သာမယ်။

သွေးကျဆေးအမျိုးမျိုး
၁။ Diuretics ဆီးသွားစေတဲ့ဆေးအုပ်စု၊ Hydrochlorothiazide, Lasix, Torsemide, Triamterene, Hydrochlorothiazide, Metolazone
၂။ Beta-blockers (ဘီတာ-ဘလော့ကား) အုပ်စု၊ Atenolol, Propranolol, Metoprolol, Nadolol, Betaxolol, Acebutolol, Pindolol, Bisoprolol
၃။ ACE inhibitors (အေစီအီး-အင်ဟဘစ်တာ) အုပ်စု၊ Enalapril, Captopril, Lisinopril, Benazepril, Quinapril, Perindopril, Ramipril, Trandolapril, Fosinopril, Moexipril
၎။ Angiotensin receptor blocker (ARB) (အေအာရ်ဘီ) အုပ်စု၊ Losartan, Irbesartan, Valsartan, Candesartan, Olmesartan, Telmisartan, Eprosartan
၅။ Calcium channel blockers (CCBs) (စီစီဘီ) အုပ်စု၊ Amlodipine, Sustained release Nifedipine, Felodipine, Nisoldipine
၆။ Alpha-blockers (အာလ်ဖါ-ဘလော့ကား) အုပ်စု၊ Clonidine

သွေးကျဆေးတမျိုးမကရောပေးပါမယ်။ လိုလာရင် အတိုးအလျှော့နဲ့ ဆေးပြောင်းပေးမယ်။ နှလုံးမကောင်းရင်၊ ကျောက်ကပ်မကောင်းရင်၊ နှလုံးသွေးကြောကျဉ်းနေရင်၊ (ACE) inhibitors or (ARB) ဆေးတွေကို သုံးသင့်တယ်။ နှလုံးခုန်မြန်နေသူများနေသူတွေကို Beta-blockers ဆေးတွေကိုသုံးသင့်တယ်။ ကိုယ်ရောင်နေရင် Diuretics ဆီးသွားစေတဲ့ ဆေးတွေပါပေးရမယ်။ ကိုယ်ဝန်သွေးဆိပ်တက်ရောဂါ (PET) or Eclampsia ဖြစ်နေရင် Beta-blockers, Hydralazine, Labetalol, Alpha Methyldopa, Calcium Channel Blockers တွေပေးနိုင်တယ်။ ACE inhibitors, ARB drugs, Diuretics တွေကို မပေးရပါ။ သွေးတိုးများလွန်းနေရင် (ACE) inhibitors, (ARB), Beta-blockers, Diuretic, Calcium Channel Blockers, Alpha-blockers, Clonidine, Minoxidil, Vasopeptidase blocker တွေကိုပေးနိုင်တယ်။ အရေးပေါ်အခြေအနေမှာ Sodium Nitroprusside နဲ့ Labetalol ထိုးဆေးထိုးပေးနိုင်တယ်။

သွေးတိုးနဲ့ အစားအစာ
အစားမတော်တလုပ်ဆိုတာ ဒီနေရာမှာလဲမှန်တယ်။ DASH နည်းကို အမေရိကန်ဆရာဝန်တွေက ညွှန်းတယ်။ ဆန်-ဂျုံ-ပြောင်း-ပြောင်းဖူး-ဘာလီ-ရိုင်းစပါး-အုတ်စပါးစတဲ့ အနှံတွေကို ဖွေးဖြူသွားတဲ့အထိ မဖွပ်သေးဘဲစားသုံးတာ ပိုကောင်းတယ်။ ကြက်သား၊ ငါးနဲ့ အစေ့အဆံတွေကို အစားခိုင်းပြီး၊ အဆီ၊ အမဲသား-ဝက်သား-ဆိတ်သား၊ အချိုတွေနဲ့ သကြားပါသောက်စရာတွေကို လျှော့စေတယ်။ လူအများစားသုံးကြတဲ့ ကြံကထုတ်တဲ့ Sucrose သကြားမျိုးက သွေးတိုးစေတယ်။ ဖိုင်ဘာခေါ်တဲ့ အမျှဉ်ပါတဲ့အစာတွေကို ညွှန်းတယ်။ ဆားစားရင် သွေးတိုးများတယ်။ ဆားဆိုတာ ဆိုဒီယမ်ဖြစ်တယ်။ ဆားစားများတဲ့ လူမျိုးတွေမှာ သွေးတိုးပိုဖြစ်တယ်။ NIH ကနေသတ်မှတ်ပေးထားတဲ့ တနေ့တာ စားရမဲ့ ဆားပမာဏဟာ 2,400 mg ထက် မပိုသင့်ပါတဲ့။ အိမ်သုံးဆားမှာ ဆိုဒီယမ် ၄ဝ% ပါတယ်။ အကြမ်းဖျင်း ပါးစပ်ထဲဝင်သမျှ အစာ-အရည်တွေထဲမှာ တနေ့ကို ဆား လက်ဖက်ရည်ဇွန်း တဇွန်းစာသာ ပါပါစေ။ တနေ့ကို ဆား 1,500 mg သာ စားသူတွေမှာ အကျိုးရှိတာတွေ့ရတယ်။ အစာအာဟာရနည်းနဲ့ ကုသလို့ သွေးတိုးမဖြစ်၊ သွေးတိုးရှိနေရင်လဲ သက်သာတယ်။ တရုတ်နံနံ၊ ကြက်သွန်ဖြူ၊ ကြက်သွန်နီ၊ ခရမ်းချဉ်၊ မုံလာပွင့်စိမ်း၊ မုံလာဥနီ၊ နနွင်း၊ စမုန်နက်၊ တောရုံး၊ ငရုတ်ကောင်း၊ ပင်စိမ်း၊ ဝယ်စားတဲ့အစာတွေထဲမှာ ဆားဘယ်လောက် ပါတယ်ဆိုတာ သတိထား ဆင်ခြင်-ရှောင်ကြဉ်ပါ၊ အသင့်ဝယ်ရတဲ့အစားအစာ၊ သွားရည်စာတွေရှောင်ပါ။ ချက်-ပြုတ်-ကြော်-လှာ်ပြီးသာ အစားထဲ ဆား ထပ်မထည့်ပါနဲ့။ အိန္ဒိယား၊ မီဇိုးနဲ့ ချင်းလူမျိုးတွေ ဆားပန်းကန် တည်တဲ့အလေ့ ရှိကြတယ်။ ဆိုးစေနိုင်တယ်။ ဗမာကြိုက် ငါးပိ-ငံပြာရည်-ငါးခြောက်-ပုဇွန်ခြောက်၊ တရုတ်လက်စွဲ ပဲငံပြာရည်၊ ဘာဘီကျူးဆော့စ် လျှော့ပါ။ အချဉ်တည်ထားတာ မစားပါနဲ့၊ ဆားသုံး-အခြောက်လှမ်းအစာ မတည့်ပါ။ ဟင်းချိုမှုံ့၊ အသားမှုံ့တွေမှာ MSG မှာ ဆိုဒီယမ်ပါလို့ မသင့်ပါ။

ဆားတခုထဲ လျှော့တာနဲ့ မရသေးပါ။ ပိုတက်ဆီယမ်များဖို့ လိုသေးတယ်။ Potassium acetate, Potassium bicarbonate, Potassium citrate, Potassium chloride, Potassium gluconate နာမည်နဲ့ ဆေးသောက်ပါ၊ ငါး၊ ပင်လယ်စာ၊ ချဉ်တဲ့အသီး၊ ပန်းသီး၊ ငှက်ပျောသီး တွေနဲ့ မုံလာပွင့်စိမ်း၊ ပဲ၊ ပဲသီး၊ ခရမ်းချဉ်၊ အခွံပါအာလူး၊ ဟင်းနုနွယ်ရွက်၊ မုံညင်းဖြူတွေမှာများများပါတယ်။ ကလေးတွေမှာ ပိုတက်ဆီယမ် တနေ့ 780-1,600 mg နဲ့ လူကြီးတွေမှာ 1,600-2,000 mg လိုတယ်။ Omega-3 fatty acids က အကျိုးများစေတယ်။ Calcium 800-1,200 mg ဒါမှမဟုတ် Magnesium 300 mg သောက်ပါ။

သွေးတိုး အစာအာဟာရ ဥပဒေသ = S သုံးလုံးရှောင်ဥပဒေသ မှတ်ပါ။ Saturated fat, Sugar and Salt တွေ နည်းရမယ်။ အဆီအမျိုးအစား များတဲ့အစာအစာတွေ = မလိုင်၊ ဒိတ်ခဲ၊ ထောပတ်၊ ဂီး၊ စားအုံးဆီ၊ ဝါစေ့ဆီ၊ ချော့ကလက်၊ ကယ်လိုရီ + ကိုယ်အလေးချိန် + အဆီတွေဟာ သွေးတိုးအတွက် မကောင်းပါ။ ဆိုဒီယမ်များတာ လုံးဝမကောင်းပါ။ ပိုတက်ဆီယမ်များတာ ကောင်းတယ်။ ကယ်လ်ဆီယမ်နည်းတာ မကောင်းပါ။

သွေးတိုးသမားတွေအတွက် လေ့ကျင့်ခန်း
သွေးပူလေ့ကျင့်ခန်း ၅-၁ဝ မိနစ် နဲ့စပါ။ ယောဂဖြစ်ဖြစ် တခြားနည်းဖြစ်ဖြစ်လုပ်ပါ။ အများဆုံး-နှလုံးခုန်နှုန်း ရဲ့ ၈ဝ% ထက် မပိုသင့်ပါ။ ၂၂ဝ ထဲကနေ ကိုယ့်အသက်ကို နုတ်ရင် MHR ရတယ်။ (MHR = 220 – Age) ကိုယ့်အလေးချိန်ကနေ ဖိစီးတဲ့ လေ့ကျင့်နည်းမျိုး မလုပ်သင့်ပါ။ အများအားဖြင့် လူတွေက ဝကြလို့ပါ။ တခါလုပ်ရင် ၂ဝ-၃ဝ မိနစ် ကြာသင့်တယ်။ ၇ ရက်တပါတ်မှ ၄ ရက်လုပ်သင့်တယ်။ ပြီးရင် ၅-၁ဝ မိနစ် နားလိုက်ပါ။ အလေးချိန်-လျှော့နည်းလုပ်နေတုံးမှာ အသက်ရှူအောင့်ထားတာမျိုး မလုပ်ပါနဲ့။

သွေးတိုး ခဏကျနေတာကို ပျောက်သွားပြီလို့ မထင်ပါနဲ့။ စာတွေကို အေးအေးဆေးဆေးဖတ်ပြီး လိုတာကိုလိုက်နာပါ။
• High blood pressure သွေးတိုးအမေး http://doctortintswe.blogspot.com/2016/03/high-blood-pressure-question.html
• Hypertension (1) သွေးတိုးရောဂါ (၁) http://doctortintswe.blogspot.com/2014/11/hypertension-1.html
• Hypertension (2) သွေးတိုးရောဂါ (၂) http://dts-medicaleducation.blogspot.in/2012/06/hypertension.html
• Ischemic Heart Disease နှလုံးသွေးကြောကျဉ်းရောဂါ http://doctortintswe.blogspot.com/2014/11/ischemic-heart-disease.html
• Medicines for High Blood Pressure သွေးတိုးဆေးများ http://doctortintswe.blogspot.com/2014/12/medicines-for-high-blood-pressure.html
• Side Effects of High Blood Pressure Medications http://www.webmd.com/hypertension-high-blood-pressure/guide/side-effects-high-blood-pressure-medications?ecd=wnl_hyp_061313&ctr=wnl-hyp-061313_ld-stry&mb=
• Stroke Emergency Treatment ဆထုပ် အရေးပေါ်ကုသခြင်း http://doctortintswe.blogspot.com/2015/12/stroke-emergency-treatment.html
• Stroke ဦးနှောက်သွေးကြော ဖောင်းပြီးပေါက်ခြင်း http://doctortintswe.blogspot.com/2015/07/stroke.html
• Stroke ဦးနှောက်သွေးကြောမတော်တဆဖြစ်ခြင်း http://doctortintswe.blogspot.com/2014/11/stroke_22.html

သွေးတိုးသက်သာအောင် ငန်-ချို-ဆီ ရှောင်။ ဆေးအမြဲဆောင်။

Dr. တင့်ဆွေ