A fugitive surgeon ခွဲဆရာဝန်
• ခွဲတော့ ခွဲတတ်တယ်။ ခွဲလည်းခွဲခဲ့တယ်။ ဒါပေမဲ့ အခုကမှ တကယ့်ခွဲဆရာဝန်ဖြစ်နေပြီ။
• ဘယ်လို့လဲဆရာ။
ကျွန်တော်က ဆေးပညာဘွဲ့တခုတည်းသာရလို့ ရိုးရိုးဆရာဝန်လို့ခေါ်တယ်။ ဘွဲ့က တခုထဲပေမဲ့ နှစ်မျိုးပါတယ်။ MB ဆေးကုပညာဝိဇ္ဇာဘွဲနဲ့ BS ခွဲစိတ်ပညာဝိဇ္ဇာဘွဲ့။ ဆရာဝန်တွေ MBBS ဘွဲ့ရပြီးနောက်မှာ တယောက်တမျိုးစီ ဖြစ်လာကြတယ်။ ကျွန်တော်လို ရတဲ့ဘွဲ့လေးတခုနဲ့ အရိုးထုတ်ကြရသူကများတယ်။ အဲလိုဆရာဝန်တွေထဲမှာလည်း ဆေးကုတာအားသန်သူနဲ့ ခွဲစိတ်တာမှာ စိတ်ပါသူလို့ မတူကြပြန်ဘူး။ ကျွန်တော်က အစုံသုပ်လုပ်ပါတယ်။ ဒါပေမဲ့ ဓါးဆရာဝန်လို့ နာမည်တပ်သူတွေက တပ်ကြတယ်။ ဒေလီမှာနေရတုံးက ကလေးပေါင်း ၃၅ဝ ကိုမွေးပေးလို့ အိုဂျီလို့ အမှတ်မှားနေကြတယ်။ အမှန်က အိုပြီဆရာဝန်ပေါ့ဗျာ။
မဲဆောက်က ဒေါက်တာဆင်သီယာ ဆေးခန်းရောက်လဲ ခွဲစိတ်ခန်း ဝင်ပေးသေးတယ်။ ဗိုလ်ချုပ်မြရွာကဆေးရုံလေးမှာလဲ ခွဲစိတ်ပေးဘူးတယ်။ ထိုင်း-မြန်မာနယ်စပ် ချောင်းကလေးဘေးမှာ ပါတီတခုတည်းက စည်းရုံးရေးမှူးတယောက်ကို အစည်းအဝေးနာချိန်မှာ မိုင်နာဆာဂျရီ လုပ်ပေးဘူးတယ်။ အိုက်ဇောမှာလဲ မြန်မာ ယက်ကန်းသမားတွေကို ခွဲစိတ်တာ အပါအဝင် ဆေးကုပေးတယ်။ တမူးဟိုဖက်က မိုးရေးမှာလဲ အဲလိုဘဲ။ အဲတာတွေမှာ ပိုးသန့်ထားတဲ့ သီးသန့်ခွဲစိတ်ခန်းတို့၊ မေ့ဆေးဆရာဝန်တို့ ခွဲစိတ်ခန်းသူနာပြုတို့ ဘယ်ရှိမလည်း။
၁၉၈၁ တုံးက ရန်ကုန် အင်းစိန်မှာ တနှစ်တည်းဆေးကျောင်ဆင်း သူငယ်ချင်းတွေစုဝေးခဲ့တုံးက ကျွန်တော့်လက်နဲ့ ခွဲတာကိုခံရဲတဲ့ သတ္တိအကောင်းဆုံးသူငယ်ချင်းကိုယ်တိုင်ကပြန်ပြောမှ အဲတာကိုအမှတ်ရတယ်။
မြန်မာပြည်မှာတုံးက အစစအရာရာရှာပါးလွန်းလှတဲ့ ဆိုရှယ်လစ်ခေတ်ကြီးထဲမှာ ကိုယ်ပိုင်စုဆောင်းထားခဲ့တဲ့ ခွဲစိတ်ကိရိယာတွေကိုပါ တိုင်းပြည်ကနေထွက်ပြေးရတော့ ပြစ်ထားခဲ့ရတယ်။ နှမြောလိုက်တာ မပြောပါနဲ့တော့။
ဒေလီရောက်တော့ ခွဲစိတ်လူနာတွေတွေ့ပြန်တဲ့အခါ လက်နက်သာရှိပြီး ကျည်ဆံမရှိပြန်လို့ ခွဲစိတ်ကိရိယာတွေ ပြန်စုရပြန်တယ်။
နိုင်ငံရေးထဲရောက်မှ တိုင်းပြည်နဲ့ခွဲရတယ်။ ခွဲစိတ်လူနာတွေနဲ့ပါ ခွဲရတယ်။ ကိုယ်ပိုင်စုဆောင်းထားခဲ့တဲ့ ခွဲစိတ်ကရိယာတွေနဲ့လည်း ခွဲခဲ့ရတာနှစ်ကြိမ်။ အခုတတိယနိုင်ငံရောက်တော့ ခွဲစရာပြည့်စုံသွားတယ်။ ခွဲဆရာဝန်အစစ် ဖြစ်လာပါတော့တယ်။ လက်မတုန်သေးပါ။ စိတ်မကုန်သေးပါ။
ဒေါက်တာတင့်ဆွေ
၆-၁၁-၂ဝ၁၄
ဓါတ်ပုံ = ၂၂-၄-၂ဝ၁၄ နေ့က ဒေလီ ယမုန်နာဆေးခန်းမှာ ခွဲစိတ်လူနာတဦးကို အူအတက် ခွဲစိတ်ကုသပေးစဉ်က
Comments
Post a Comment