General Surgery အထွေထွေခွဲစိတ်ပညာ
ကျေူဇူးပဲ ဆရာလေးရေ့့။ ကျွန်တော် စစ်ကိုင်းတိုင်း ပုလဲမှာ မြို့နယ်ဆရာဝန်လုပ်စဉ်က လက်ထောက်ဆရာဝန်ဖြစ်ခဲ့သူ ဒေါက်တာမောင်ဝင်း တင်ထားတာကို ဖတ်ရပါတာပါ။ အနှစ်နှစ်ဆယ်ကျာ်တုံးက ခွဲစိတ်ခန်းလေးတွေကို ပြန်ပြီး အမှတ်ရစေတယ်။
ကျွန်တော် ၁၉၇၃-၇၄ တုံးက မုံရွာဆေးရုံမှာ စပြီးတာဝန်ကျတယ်။ မြို့နယ်ဆရာဝန်ကြီး ဒေါက်တာဦးခင်မောင်ဇံနဲ့ တခြား စီနီယာဆရာတွေဆီကနေ ခွဲစိတ်ပညာလက်ထပ်သင်ယူခဲ့တယ်။ တနှစ်လောက်သာကြာတဲ့အထဲ ဖေါင်ကြီးသင်တန်းကို လေးလသွားလိုက်ရသေးတယ်။
နောက်မှာ မြို့သာတိုက်နယ်ဆေးရုံမှာ တာဝန်ကျတယ်။ အဲဒီကစပြီး တယောက်တည်းနဲ့ ခွဲတာစိတ်တာတွေ လုပ်ရပါတော့တယ်။ မုတ်ရောဂါ၊ ပန်းငုံတာကနေစတယ်။ အူကျတာလုပ်တယ်။ အရေးပေါ်ဗိုက်ခွဲရတာတွေက မလုပ်မဖြစ်လုပ်ရတယ်။ အူအတက်ပေါက်တာ၊ အစာအိမ်ပေါက်တာ၊ အူပိတ်တာ။ ဗိုက်ခွဲကလေးမွေးပေးတာ။ ဆီးကျောက်တည်တာ။ နောက်ထပ်အရေးပေါ်တွေထဲမှာ ထန်းလျှောလို့ အရိုးကျိုးတာတွေ၊ ရာဇဝတ်မှုကြောင့် ဓါး၊ လှန်နဲ့ထိုးတာတွေ။
တဖြေးဖြေးနဲ့ အေးအေးဆေးဆေး ရက်ရွေးခွဲရတာမျိုးတွေပါလုပ်နိုင်လာတယ်။ ရိုးရိုးနဲ့ ကင်ဆာအပါအဝင် ရင်သားအကျိတ်မျိုးစုံ၊ တခြားအလုံး အကျိတ်မျိုးစုံ။ သားအိမ်ကျတာ၊ သားအိမ်ထုတ်တာ။
နောက်ပိုင်းမှာ လည်ပင်းကြီးကိုပါခွဲတယ်။ လည်ပင်းကြီးရောဂါကိုခွဲရတာ အတော်ကိုသတိကြီးရတယ်။ ဦးနှောက်ကိုသွားတဲ့ သွေးကြောတွေ၊ အာရုံကြောတွေ၊ အသံအိုးနဲ့ မျက်စိနဲ့မမြင်နိုင်တဲ့ (ပါရာသိုင်းရွိုက် ဂလင်း) တွေကို သတိထားရလို့ ဆရာဝန်တချို့က မခွဲချင်ကြပါ။ ကျွန်တော့်လက်က ကံကောင်းတယ်။
မြို့သာမှာ ၆ နှစ်ကြာတယ်။ ခွဲစိတ်ခန်းမှတ်တမ်းလေးကို ပြန်ဖတ်ချင်နေမိတယ်။ မြို့သာပြီးတော့ စစ်ကိုင်းဆေးရုံမှာ ၂ နှစ်လောက်။ နောက်တော့ ပုလဲဆေးရုံမှာ ၅ နှစ်ကြာခဲ့တယ်။ ရောက်တဲ့နေရာတိုင်းမှာ ခွဲစိတ်ပါတယ်။ ဆရာဝင်းရေးတဲ့ ကျွန်တော်တို့ဆရာ ညွှန်ချုပ်ဒေါက်တာဦးကျော်ဝင်းက တင့်ဆွေနဲ့ မောင်ဝင်း၊ မခွဲဖူးတာမရှိဘူးလို့ပြောသတဲ့။ ဦးနှောက်၊ နှလုံးနဲ့ အဆုပ်ကိုတော့ မခွဲဘူးပါ။ အာသီးလည်းခွဲတယ်။ နှုတ်ခမ်းကွဲ၊ အာခေါင်ကွဲပြုပြင်ပေးတယ်။ မျက်စိလည်း နည်းနည်းခွဲတယ်။ ကျောက်ကပ်ခွဲတယ်။ အသည်းတောင် နည်းနည်းပါသေးတယ်။
ခွဲစိတ်ပညာစာအုပ်မှာမပါတာတွေလည်း တခါတလေတွေ့ပါတယ်။ တခါက လူရွယ်ချင်းရန်ဖြစ်တာ တယောက်နေကိုက်လို့ နှာခေါင်းတဖက်ပြတ်သွားတယ်။ အနာကျက်အောင်လုပ်ပေမယ့် မျက်နှာဆိုတော့ ရုပ်ဆိုးနေမယ်။ ပြတ်သွားတဲ့နေရာက နှာခေါင်းမှာ ဘယ်ဖက်က ဖေါင်းဖေါင်းခုံးခုံးနေရာလေး။ တပါတ်နှစ်ပါတ်လောက် ကြံဖန်စဉ်းစားတယ်။ နောက်ဆုံးမှာ အရိုးနုလည်းဖြစ်တဲ့ နားရွက်တဖက်က ခုံးနေတဲ့နေရာလေးကို အနေတော်ဖြတ်ယူပြီး ဖြည့်ဆက်ပေးခဲ့ဘူးတယ်။ အကောင်းကြီးတော့ မဟုတ်ပါ။
သားအိမ်ထဲမှာမဟုတ်တဲ့ ဝမ်းဗိုက်ခေါင်းထဲမှာ ကိုယ်ဝန်ဆောင်တာကို စာတပုဒ်ရေးဘူးတယ်။ အဲဒီခေတ်မှာ ဖလင်နဲ့ ရိုက်တဲ့ကင်မရာတောင်မသုံးနိုင်လို့ ဘာမှတ်တမ်းဓါတ်ပုံမှ မကျန်ရစ်ပါ။ မကျန်တာလည်းကောင်းပါတယ်။ အဲလို အထူးကုဆရာဝန်ဟုတ်သူတွေကနေ ကြံဖန်ခွဲစိတ်ရတာမျိုးကို ဆန်းလို့ စာတမ်းတင်မိရင် တရားစွဲခံရနိုင်တယ်။
ကျွန်တော့်လက်နဲ့ ခွဲစိတ်ကုသပေးခဲ့ဘူးသူတွေအားလုံးအတွက် ဆုတောင်းပေးလိုက်ပါတယ်။ အားနည်းချက်တွေ ရှိခဲ့ရင်လည်း တောင်းပန်အပ်ပါတယ်။
ဒေါက်တာတင့်ဆွေ
၁၄-၁၂-၂ဝ၁၅
Comments
Post a Comment