Tubal ligation အမျိုးသမီး သားသမီး မရတော့အောင် လုပ်ခြင်း

၁။ ဆရာ ကျွန်မအသက် ၄၁ ထဲရောက်နေပါပြီ၊ ခုကိုယ်ဝန်က ၃ ယောက်မြောက်ပါဆရာ အရင်ကလေး ၂ ယောက်ကိုလည်း ခွဲမွေးထားတာပါ။ မန္တလေးကိုသွားမွေးမှာပါဆရာ၊ သားကြောဖြတ်ရင် တခြားအကျိုးဆက်က ဘာတွေများ ခံစားရမလည်းရှင့် IUD ထည့်တာနဲ့ သားကြောဖြတ်တာ ဘယ်ဟာလုပ်သင့်တယ်ဆိုတဲ့ ဆရာဆီက အကြံပေးတာကို နားထောင်မှာပါဆရာ။ IUD ထည့်ရင် နောက် ၉ နှစ်လောက်ဆို သွေးဆုံးနိုင်ခြေများတယ် ခဏတိုင်း ထည့်စရာ မလိုလောက်ဘူး ထင်မိလို့ပါရှင့် အမေက ၅၀မှာ သွေးဆုံးထားလို့ပါရှင့်။ ကျေးဇူးပြုပြီးညွှန်ပြပေးပါရှင့်။

၂ နည်းလုံးက ဟော်မုန်းအသုံးမပြုပါ။ စိုးရိမ်စရာမရှိပါ။

ကျေးဇူးပါဆရာ၊ သားကြောဖြတ်တာက မိန်းမတွေမှာ ခေါင်းကိုက် အကြောတက်တာတွေ အနည်းနဲ့အများ ခံစားရတယ် ပြောလို့ပါရှင့်။ (မဟုတ်ပါ။)

၂။ ဆရာရှင့် ကျွန်မအသက်က ၃ဝ ပါ။ အိမ်ထောင်ရှိပါတယ်။ ကလေး ၂ ယောက်ပါ။့့ မှာနေပါတယ်။ သားကြော ဖြတ်ချင်လို့ပါ။ သားကြောဖြတ်တဲ့အကြောင်းလေးသိချင်လို့ပါ။ ဖြတ်ရင်ဆေးရုံမှာရက်ကြာနေရလားသိချင်လို့ပါ။ ကျေးဇူးတင်ပါတယ်။

၃။ သမီးကအခု ၃၇ နှစ်ထဲမှာပါ။ ဒုတိယကိုယ်ဝန်က အခု ၇ လထဲမှာပါ။ OG ကမေးနေတာ သားကြော ဖြတ်မလား မဖြတ်ဘူးလားတဲ့ ဆိုးကျိုးကောင်းကျိုးမသိလို့ သမီးမဖြေနိုင်ဘူးဖြစ်နေတာ။ ကြောက်တော့ ကြောက်တယ်။ မိန်းမတွေ သားကြောဖြတ်နဲ့ ပတ်သက်ပြီးတော့လည်း တင်ပြပေးပါဦးနော်။

အမျိုးသမီးများကို ရာသက်ပန် သားသမီးမရအောင်လုပ်နည်း ၂ နည်းရှိတယ်။ အများဆုံးသုံး-အများလည်း သိတဲ့နည်း ကတော့ သားအိမ်ပြွန်ကို ခြည်-ဖြတ်နည်းပါ။ သားအိမ်ပြွန်ထဲကို (စပရင်) လိုတခု ထည့်ပေးနည်းက နောက်တမျိုးပါ။ မြန်မာအမျိုးသမီးတွေ လက်လှမ်းမီကြမဲ့ ပဌမနည်းကိုသာရေးပါမယ်။

အမျိုးသမီးများဟာ အရွယ်ရောက်ချိန်ကစပြီး သွေးမဆုံးခင်အချိန်အထိ လစဉ်လတိုင်း မ-မျိုးဥအိမ်ကနေ မ-မျိုးဥ တလုံး ထွက်ပေးနေတယ်။ ရာသီမှန်နေသူကို ပြောတာပါ။ ဥက တကယ်လို့ ကျားသုတ်ပိုး ဝင်လာမယ်ဆိုရင် သားအိမ်ပြွန်ခေါ်တဲ့ ချိုနဲ့လည်းတူတဲ့ နှစ်ချောင်းလည်းရှိတဲ့ အခေါင်းပါပြွန်ရဲ့ အပြင်ထိပ်ပေါက်နေ သားအိမ်ထဲကို ဝင်လာလိမ့်မယ်။ ပြွန်ထဲမှာ ဖူးစာဆုံ-ပေါင်းစပ်ရာကနေ သန္ဓေတည်-ကိုယ်ဝန်ဆောင်ရတယ်။ သူတို့တတွေ မတွေ့-မဆုံ-မပေါင်းစပ် နိုင်အောင် ပြွန်လမ်းကို အသေပိတ်လိုက်တဲ့နည်းက Tubal Ligation ဖြစ်ပါတယ်။

ဒီနည်းမှာလည်း ၂ နည်းရှိတယ်။ Laparoscope ပစ္စည်းကရိယာ စုံတဲ့နေရာမှာဆိုရင် အပြင်လူနာအနေနဲ့၊ ထုံဆေးနဲ့ လုပ်လို့ ရတယ်။ တိုင်းပြည် အများအပြားမှာတော့ ဆေးရုံခဏတင်၊ ခါးထုံဆေးနဲ့ ခွဲပေးတတ်တယ်။ မကြာပါဘူး။ ခွဲပြီး ၇ ရက် ချုပ်ရိုးဖြေတာ မစောင့်ချင်ရင် စောစောအိမ်ပြန်လွှတ်မှာပါ။ ကလေးမွေးပြီး၊ ၂ ပါတ် အတွင်းခွဲရင် ဆရာဝန်အတွက် ပိုလွယ်တယ်။ သားအိမ်ကမြင့်နေသေးတာမို့ အောက်အတွင်းထဲအထိ နှိုက်စရာမလိုဘူး။ ဘယ်နည်းနဲ့ ခွဲခွဲ ခွဲစိတ်တဲ့ နေရာက နာတာသက်သာတာနဲ့ အိမ်ထောင်နဲ့အတူ ပြန်နေလို့ရတယ်။ ဗိုက်ခွဲမွေးရင်းလည်း လုပ်ပေးလို့ရတယ်။

၉၉့၅% ထိရောက်တယ်လို့ ဆိုတယ်။ ဒီအထဲမှာ သားအိမ်ပြင်ပ သန္ဓေတည်တာတော့ ကံမကောင်းရင် ဖြစ်နိုင်တယ်။ အတော်တော့ ရှားပါတယ်။ အဲလို ချည်-ဖြတ်ပြီးမှ ပြန်လိုချင်ပြန်လို့ နောက်ထပ် ခွဲစိတ်ပြုပြင်ရသူတွေမှာ အဲလိုဖြစ်တာ ပိုများတတ်တယ်။ နောက် ရှားတာလေးတွေလည်း ရှိသေးတယ်။ ရာသီဖြစ်စဉ် ပြောင်းသွားလို့ ရာသီလာတဲ့အချိန်မှာ နာတာ၊ ကြားရက် သွေးဆင်းတာ၊ ရာသီမလာဘဲနေတာ။ ဒါလဲ ဖြစ်တဲ့သူ မများလှပါဘူး။

အားကောင်းချက်တွေ အရင်သိရအောင် ရေးရရင်။ ရာသက်ပန် ကလေးမရတော့ပါ။ ချက်ချင်း ထိရောက်တယ်။ မလိုချင်တော့တဲ့ ကလေးရမှာ ကြောင့်ကျမှု ကင်းသွားမယ်။ ကုန်ကျစရိတ် မများပါ။ မ-မျိုးဥအိမ် ကင်ဆာ ဖြစ်တာ နည်းတာကို တွေ့လာရတယ်။ သားကြောဖြတ်ထားသူ အမျိုးသမီးမှာ ဆက်ဆံစိတ်မျိုး ဘာမှ ထူးခြား ပြောင်းလဲစရာ မရှိပါ။ တချို့ဆိုရင် ကိုယ်ဝန်ရမှာမျိုး စိုးရိမ်စိတ် မရှိတော့တာမို့ ပိုလို့တောင် စိတ်ဖြစ်ပေါ်လာသေးပါတယ်။ အဲ့ ခင်ပွန်းအပေါ် သစ္စာစောင့်ရပါလိမ့်မယ်။

အားနည်းချက်တွေလဲ သိထားပါ။ ခွဲစိတ်တာ ခံရမယ်။ ယောက်ျားတွေကို လုပ်ရတာထက် နည်းနည်း ရှုတ်ထွေးတယ်။ ဒါတောင် ယောက်ျားတွေကို လုပ်ကြတာထက် အဆ ၄ဝ အမျိုးသမီးတွေမှာ လုပ်နေကြပါတယ်။ ဆုံးဖြတ်ချက်ကို ခိုင်မာပြီးမှ လုပ်သင့်တယ်။ လိင်ကတဆင့် ကူးစက်ရောဂါတွေကို မကာကွယ်ပါ။ ဗိုက်ခွဲမွေးတာ ၃ ခါသာလုပ်လို့ သားကြောဖြတ်သူအတွက် ထူးပြောရန်မရှိပါ။ ကလေး ၁-၂ ယောက်တည်းနဲ့ သားကြောဖြတ်ထားသူတွေက အကြောင်း အမျိုးမျိုးကြောင့် ကလေးပြန်ရလိုသူတွေက မေးကြတာ အတော်များတယ်။ ပြန်ဆက်ချင်ရင် အတော်ခက်တယ်။

တကမ္ဘာလုံးမှာ အမျိုးသမီး ၃၃% က ဒီနည်း လုပ်ထားကြပါတယ်။ ဖွံ့ဖြိုးဆဲ တိုင်းပြည်တွေမှာ ရာနှုန်းပိုများတယ်။ မြန်မာပြည်မှာ ဥပဒေအရ Sterilization board ကနေကျမှသာ လုပ်ခွင့်ရှိတယ်။ လူဦးရေများတဲ့ တိုင်းပြည်တွေမှာ အလကားလုပ်ပေးတယ်။ အားပေးတယ်။ တချို့ဆီမှာ အတင်းအဓမ္မ အလုပ်ခိုင်းတယ်။

Tubal reversal သားကြောဖြတ်ပြီး ကလေးပြန်ရချင်တယ် http://doctortintswe.blogspot.com/2014/11/pregnancy-after-tubal-ligation.html

Dr. တင့်ဆွေ
၁၈-၈-၂ဝ၁ဝ
၂၂-၄-၂ဝ၁၅
၆-၁-၂ဝ၁၆

၂၁-၉-၂ဝ၁၇

Comments

Popular posts from this blog

ကျန်းမာခြင်းသည် လာဘ်တပါး

Furamin BC သံဓါတ်အားဆေး