Ibuprofen အိုင်ဘူပရိုဖင်နဲ့ ကြက်တောင်ရိုက်ခြင်း
ကျွန်တော်ကတော့ ကြက်တောင်ဝင်ရိုက်တယ်။ ငယ်ငယ်က မုံရွာမှာကစားဖူးပါတယ်။ မြို့သာမှာ တာဝန်ကျတော့လည်း ကြက်တောင်ကစားတယ်။ ပုလဲရောက်တော့ တင်းနစ်ကစားတယ်။ ပြည်ပထွက်ရကတည်းက အားကစားတွေနဲ့ ဝေးတော့တယ်။ ကနေ့ဝင်ကစားတာက နာရီဝက်လောက်ပါ။ မကစားတာကြာတော့ အိမ်ပြန်ရောက်လို့ မေးခွန်းတွေ ဖြေနေရင်း ဒူးကောက်ကွေးတဖက်ကနာလာတယ်။ နောက်တဖက်ပါနာလာပြန်လို့ Ibuprofen 200 mg တပြား သောက်လိုက်ရတယ်။
Ibuprofen ဆေးဟာ အနာ-အကိုက်-အဖျားသက်သာဆေးဖြစ်တယ်။ အနာကိုသက်သာစေတဲ့အဆင့် ၃့၅ ရှိတယ်။ ကိုက်ခဲတာ၊ အအေးမိတာ၊ သွားကိုက်တာ၊ ကြွက်သားနာ၊ ရာသီလာစဉ်နာ၊ လေးဘက်နာ၊ အဖျား၊ အရိုးရောင်တာ၊ ခေါင်းကိုက်၊ ခါးနာတာတွေအတွက်သုံးတယ်။ အစား ဒါမှမဟုတ် နွားနို့နဲ့ သောက်သင့်တယ်။ အချိန်မှန် အချိန်တူ သောက်သင့်တယ်။ Ibuprofen, Ibugesic 200-400-800 mg တနေ့ ၃-၄ ကြိမ်၊ ကလေး၊ ၆လ မှ ၁၂ နှစ်၊ ၅-၁ဝ မီလီဂရမ်/ကေဂျီ၊ အများဆုံး တနေ့ ၃့၂ ဂရမ်၊ (၁ဝ) ရက်ထက် မကျော်စေရ။
အဲလိုဆေးတွေကိ်ု (NSAIDs) လို့ခေါ်တယ်။ သူတို့ကနေ (ပရိုစတက်ဂလင်) ဓါတ်ထုတ်လုပ်တာကို တားတယ်။ အစာလမ်းကအဖုံးလွှာကို အက်စစ်ဓါတ်ကို ပျယ်စေအောင် လုပ်ပေးနေတာမို့ အဲလိုအနာသက်သာဆေး ၁ နှစ်ကျော် သောက်နေသူတွေထဲက ၁-၂% မှာ အစာလမ်းမှာ အနာဖြစ်ပါတယ်။ ဒီလိုဖြစ်မှာကို သက်သာစေဘို့ လေဆေးမျိုးနဲ့ တွဲသောက်ရမယ်။ Cimetidine (Tagamet, Parenteral) 400 mg စားဆေး တနေ့ ၂ ကြိမ်၊ အိပ်ယာဝင်။ Ranitidine 150 mg စားဆေး အိပ်ယာဝင်။ Omeprazole 40 mg တနေ့ ၁ ကြိမ် အစာမစားမီ၊ ၄-၈ ပါတ်ကြာ။ Pantoprazole 40 mg တနေ့ ၁ ကြိမ် ၄-၈ ပါတ်။
ဘေးထွက်ဆိုးကျိုးများ = အလာဂျီရခြင်း၊ ပန်းနာ၊ ဗိုက်အောင့်၊ ဝမ်းချုပ်၊ ရင်ပူ၊ အန်၊ ခေါင်းမူး၊ ခေါင်းကိုက်၊ မျက်စိဝေဝါး၊ နားလေထွက်၊ ဝမ်းပျက်၊ လေထ၊ အစာမကျေ၊ ခေါင်းမူး၊ စိတ်လှုတ်ရှား၊ နားထဲအသံတွေကြား၊ ဆေးမတည့်ရင် အနီပြင်ထွက်၊ ကိုယ်ပူ၊ ကိုယ်ရောင်စတာတွေဖြစ်မယ်။ သိပ်ဆိုးရင် (ရှော့ခ်) လိုဖြစ်မယ်။ အသည်းထိခိုက်မယ်။ ကိုယ်ဝန် တတိယ ၃ လနောက်ပိုင်း မပေးသင့်ပါ။
ကျွန်တော်က ဘောင်းဘီတိုကို အားကစားလုပ်ချိန်ကလွဲရင် ဝတ်လေ့မရှိပါ။ အဲတာလည်း ကျွန်တော်တို့ခေတ်က တင်းနစ် ဘောင်းဘီတိုကိုသာ သဘောကျတယ်။ အခုတထည်မှမရှိပါ။ ခုခေတ်ဘောင်းဘီတိုပွပွ မတိုမရှည်တွေကို သဘောမကျပါ။ အဲတာနဲ့ ဘောင်းဘီရှည်နဲ့ ပင်နီအင်္ကျီလက်တိုဝတ်ပြီးသာ ကစားခဲ့တယ်။ ဓါတ်ပုံတော့ မရိုက်ခဲ့ပါ။
ဒေါက်တာတင့်ဆွေ
၁၅-၆-၂ဝ၁၆
Comments
Post a Comment