MP3 file အသံဖိုင်
မေးတဲ့သူတွေဖက်မှာ အခက်အခဲရှိမှာပါ။ ကျွန်တော့်ဖက်မှာလည်း ရှိတယ်။ ပုံတွေပိုတာ သိပ်သေးရင် တနေရာကိုကူးယူ၊ ပုံကြီးချဲ့ရတယ်။ ဒါတောင်မှ ဖတ်မရာမျိုးရှိတယ်။ ပုံတွေအစောင်းတွေ ဇောက်ထိုးတွေပို့လာရင်လည်း ကြံရဖန်ရတယ်။ အသံဖိုင်ကြတော့ နေရာနဲ့အချိန်ရွေးမှသာဖြစ်မယ်။ ကျွန်တော့်မှာ ရုံခန်းရယ်လို့မရှိပါ။ ခုထိမဖွင့်နိုင်သေးပါ။ ဆောရီး။
အသံဖိုင်နဲ့ပတ်သက်လို့ မမေ့တာတခုရှိပါတယ်။ ဒေလီမှာနေစဉ်က မြန်မာပြည်ကဒုက္ခသည်တွေကို အခမဲ့ဆေးကုပေးတဲ့ ဆေးခန်းလေးတခုဖွင့်ခဲ့တယ်။ မထင်မရှားကနေ တဆင့်စကားတဆင့်နား သိလာကြတယ်။ တခြားတိုင်းပြည်တွေအထိပါ သိလာတယ်။ အဲဒီအချိန်က ဖေ့စ်ဘွတ်မပေါ်သေးပါ။ ဆက်သွယ်ရေးမှာ အီးမေးလ်သာရှိတယ်။ အီးမေးလ်တစောင်မှာ မိဘဆွေမျိုးထဲကကွယ်လွန်သွားသူတွေကို ရည်စူးပြီး ကုသိုလ်ပြုတဲ့အနေနဲ့ ဆေးခန်းလေးအတွက် လှူချင်ပါတယ်တဲ့။ နာမည်က ဗမာနာမည်မဟုတ်ပါ။ ကျေးဇူးတင်ကြောင်းနဲ့ ဘဏ်အချက်အလက်တွေ ပို့ပေးလိုက်ပါတယ်။ အဲဒီမှာ ကျွန်တော် နမော်နမဲ့နိုင်ကြောင်းပေါ်တော့တာပဲ။ ပြန်စာမှာ အသံဖိုင်နဲ့လာပါလေရော။
ကျွန်တော်က အမျိုးသားတဦးအထင်နဲ့စာပြန်တာ။ ဆရာဦးတင့်ဆွေလုပ်လိုက်မှ အဖွါးကြီးက အဖိုးကြီးဖြစ်ရောတဲ့။ ကျမက ရှမ်းနဲ့ တရုပ်စပ်ပါ။ စင်္ကာပူမှာနေတာကြာပြီတဲ့။ မနည်းတောင်းပန်ရတယ်။ မကြာခင်မှာ စင်္ကာပူဒေါ်လာ (၅ဝဝ) လည်း ဘဏ်ထဲရောက်လာပါတယ်။ အသက်-ကျား-မ ဘယ်လောက်အရေးကြီးတာလည်း ထပ်သိစေချင်လို့ပါ။
ဒေါက်တာတင့်ဆွေ
၁၂-၆-၂ဝ၁၆
Comments
Post a Comment