Labor ကလေးမွေးတော့မယ်ဆိုတာ

(ကန်တော့)

မင်္ဂလာပါ ဆရာရှင့် ကျွန်မအသက် ၂၈ နှစ်ပါ ကိုယ်ဝန်က ၃၆ ပတ်နဲ့ ၂ ရက်ပါ ခွဲမွေးဖို့ Og အပ်ထားပါတယ် အမ်ထရာဆောင်း due date က 26-6-2019 ပါ Og က 1ရက်နေ့ ရက်ချိန်းမှ ခွဲမယ့် dateပေးမှာပါ။ ကလေးက တဦးမိန်းကလေးပါ။ မိန်းကလေးဆိုပေမဲ့ နေရထိုင်ရသွက်ပါတယ်။ ဒါကြောင့် အိမ်အလုပ်တွေ လုပ်ပါတယ်။ သိပ်ပီးအငြိမ်မနေပါဘူး။ လမ်းလည်းလျှောက်ပါတယ်။ အခု ဗိုက်နာသလိုလိုရှိနေလို့ပါ လှုပ်ရှားတာများလို့ စောမွေးချင်တာလား ဆရာ။ ဗိုက်နာတာ ဘယ်လိုလက္ခဏာမျိုးလည်း သိချင်လို့ပါ ဆရာ ကျေးဇူးတင်ပါတယ် ဆရာ

အာထရာဆောင်း (အာထွာဆောင်း) လို့ ရေးရတယ်။ သိပ်ပြီးလို့ ရေးရတယ်။ သားဦးလို့ရေးရတယ်။ မိန်းကလေးဖြစ်ဖြစ် ယောက်ျားလေးဖြစ်ဖြစ် အနေအထိုင် မကွာပါ။ အနည်းဆုံး ၃၇ ပတ်ရှိမှ ဖွံ့ဖြိုးမှုစုံတယ်။

ကလေးမွေးချင်လာရင် ဗိုက်နာမယ်။ တခုခုဆင်းမယ်။ တခုခုဆိုတာ ရေလိုအရည်နဲ့ အချွဲပါတဲ့သွေး။ ကိုယ်ဝန်ဆောင်တိုင်း ဖြစ်စဉ်တွေက ထပ်တူမကျတတ်ပါ။

ကလေးမွေးတာကို ၃ ဆင့် ခွဲတယ်။ ပဌမအဆင့်ဆိုတာက မွေးချင်လို့ ဗိုက်စနာချိန်ကနေ သားအိမ်အဝ လုံးဝ ကျယ်လာတဲ့အထိကို ခေါ်တယ်။ မွေးချင်လို့ ဗိုက်နာတယ်ဆိုတာ နာလိုက် ရပ်လိုက်ဖြစ်တယ်၊ တိုးတိုး နာလာရမယ်၊ နာချိန် ကြာလာပြီး၊ နားချိန် တိုတိုလာရတယ်။ နာတာ ပိုပိုလာရပါမယ်။ တကယ်ဗိုက်နာတာကို လူနာအော်သံကို နားထောင်ပြီး၊ ခန့်မှန်းတာမမှန်ပါ။ တချို့က တကယ်မနာဘဲ အော်တာမျိုး ရှိတယ်။ ဗိုက်ပေါ် လက်တင်ထားပြီးစမ်းမှ သေချာတယ်။ သားအိမ် ကြွက်သားတွေ ညှစ်လာရင် စမ်းနေတဲ့လက်က တင်းလာတာကို သိသာတယ်။

သားဦးဆိုရင် တကယ်မွေးချင်လို့ နာတာမဟုတ်ဘဲ နာတာမျိုးကို အမွေးသင်တယ်လို့ခေါ်တယ်။ အနာခံနိုင်စွမ်း မတူကြပါ။ သားဖွါးခန်းအတွေ့အကြုံအရ အိန္ဒိယသွေးစပ်သူများ အနာမခံနိုင်ကြပါ၊ အသားဖြူသူတွေက သိပ်မအော်ကြဘဲ၊ အသား မဖြူ-မမည်းတွေက အလယ်အလတ်လိုက်တယ်။

ပဌမဆင့်ဟာ သားဦးမှာ ၁၂-၄၈ နာရီ၊ နောက် ကလေးတွေဆိုရင် ၆-၈ နာရီ ကြာတတ်တယ်။ ဒါက စာအုပ်အလိုအရပါ။ တကယ်တမ်းပြောရရင် ဒီထက် မြန်တာ၊ စောတာတွေ တွေ့ရပါတယ်။ တယောက်နဲ့တယောက် အတော်ကို မတူကြပါ။ အစည်းအဝေးနားတုန်းမှာ မွေးလူနာရှိလို့ ဆေးခန်းဝင်ကြည့်ရင်း မွေးပေးရတာမျိုး ရှိသလို၊ ၃ ရက်လုံးလုံး မအိပ်မနေ မွေးပေးရတာမျိုးလဲ ကြုံရပါတယ်။

သားအိမ်အဝ အပြည့်ကျယ်ချိန်ကနေ ကလေးမွေးပြီးတဲ့အထိကို ဒုတိယအဆင့် ခေါ်တယ်။ အပြည့်ဆိုတာ ၁ဝ စင်တီမီတာ ရှိတာကို ပြောတာပါ။ ကလေး အခုကို မွေးတော့မယ်ဆိုတဲ့ လက္ခဏာပေါင်း ၇ ချက်ရှိတယ်။

1. သားအိမ်အဝ လုံးဝပွင့်မယ်။
2. ရေမြွှာအိတ် ပေါက်မယ်။
3. အကျိအချွဲ နဲ့ သွေးရောပြီး ဆင်းမယ်။ (ရှိုး) လို့ခေါ်တယ်။
4. ကလေးခေါင်းက မိခင်ရဲ့ အစာဟောင်းအိမ်ကို ဖိတိုးလို့ မွေးလူနာဟာ ဝမ်းသွားချင်စိတ် ဖြစ်လာမယ်။ ဒါ့ကိုသိလို့ စောစောက ဝမ်းခြူပေးထားတာပါ။
5. အဲဒီအချိန်ရောက်ရင် တားထားလို့တောင် မရဘဲ ညှစ်ချင်လာလိမ့်မယ်။
6. ညှစ်ရင် ကလေးခေါင်း တိုးလာတာမို့ မွေးလမ်းအဝကိုကြည့်ရင် အပြင်ကိုစူလာတာ မြင်ရမယ်။
7. စအိုလည်း ဝိုင်းလာမယ်။

ဒီ ၇ ချက် မပြည့်စုံသေးလို့ကတော့ မမွေးသေးပါ။

ပုံကတော့ နယူးဒေလီ ယမုန်နာဆေးခန်းလေးက သားဖွါးခန်းဖြစ်ပါတယ်။ အခု မရှိတော့။ ကလေးမိခင်တွေ၊ မွေးခဲ့တဲ့ကလေးတွေနဲ့ ကူကြခဲ့တဲ့ ဆရာမတွေ နေကောင်းကြပါစေ။

ဒေါက်တာတင့်ဆွေ
၃၀-၅-၂၀၁၉